मूख्यमन्त्रीको शक्तिमा स्मारकमा रुख कटान : वन समूह

४ असोज, हेटौँडा । मूख्यमन्त्री डोरमणी पौडेलको शक्तिमा हेटौंडा–११ नवलपुरमा रहेको सहीद स्मारक क्षेत्रमा सालको रुख काटिएको छ । नवलपुर सरस्वती बसामाडी सामुदायिक वन उपभोक्ता समूहले विहिबार पत्रकार सम्मेलन मूख्यमन्त्री पौडेल अध्यक्ष रहेको स्मारकले गैरकानूनी रुपमा रुख कटान गरेको जानकारी दिएको हो । 
समूहका अध्यक्ष माधव सुवेदीले  मूख्य मन्त्री एवं सहीद स्मारक विकास समितिका अध्यष पौडलको निर्णय अनुसारसालको रुख कटान भएको बताएका हुन् । सामुदायिक वन क्षेत्र अन्तरगत स्मारकमा रुख कटान गरी घाटगद्धी गरिएको छ । भौतिक संरचना निर्माणका लागि वन नै सखाप हुने गरी रुख कटान गरेको पाईएकाले  जिल्ला वन कार्यालयमा कारवाहीका लागि निवेदन दिंदा समेत वेवास्ता भएकाले पत्रकार सम्मेलनमार्फत सार्वजनिक गर्नु परेको उपभोक्ता वन समूहका उपभोक्ता राममणि उप्रेतीले बताए । उनले वन क्षेत्रभित्र मेसिनको प्रयोग गरी जग्गा सम्याउने काम भईरहेको समेत बताए । 
समूहका उपाध्यक्ष बालकृष्ण बिडारीले स्मारकको लागि करिब ३ करोड रुपैँयाको परियोजना आएकाले एक दर्जन लाथ्रा काटिएको बताए । सामुदायिक वनमा सालका रुख कटान भएको जानकारीमा आएको भन्दै अनुसन्धानका लागि निर्देशन दिईसकेको जिल्ला वन कार्यालय मकवानपुरका प्रमुख प्रलाद धितालको भनाई छ । उपभोक्ताहरुले भने प्राकृतिक स्रोतको दोहन गर्न शक्तिको दुरुपयोग भएको भन्दै दोषिलाई कारवाही गर्न आग्रह गरेका छन् ।