वन क्षेत्र समन्वय समितिको बैठक सम्पन्न

१७ असोज, हेटौँडा । जिल्ला वन क्षेत्र समन्वय समितिको बैठक सोमबार सम्पन्न भएको छ । जिल्लाका वन क्षेत्रसँग सरोकारवाला निकाय रहेको समितिको बैठक मनहरीमा भएको हो ।

बैठकमा जिल्ला वन कार्यालयका सूचना अधिकृत विशाल भट्टराई, पशु सेवा कार्यालयका पशु विकास अधिकृत रामकृष्ण यादव, जिल्ला कृषि कार्यालयका कृषि प्रसार अधिकृत काशीराज हमाल, जल उत्पन्न प्रकोप नियन्त्रण कार्यालयका इन्जिनियर नवलकिशोर साह, राष्ट्रपति चुरे, तराई मधेश, संरक्षण विकास समितिका इकाई प्रमुख बसन्तराज गौतम, जिल्ला वनस्पति कार्यालयका प्रमुख नरहरी चापागाई, भू–संरक्षण कार्यालयका इन्जिनियर पूर्णकाजी महर्जन लगायतले आ–आफ्नो कार्यालयले आव २०७३/०७४ मा गर्ने कार्यहरुको बारेमा प्रस्तुत गरेका थिए ।

जिल्ला वन कार्यालयका प्रमुख राजेन्द्र न्यौपानेले सबैको समन्वयमा काम अघि बढाउँदा प्रभावकारी हुँने भएकाले बैठकको आयोजना गरेको र यसलाई निरन्तरता दिईने बताए । कोठामा बसेर बैठक गर्नु भन्दा विभिन्न क्षेत्रको स्थलगत अवलोकन गर्दै काम गर्न सके प्रभावकारी हुने उनको भनाई छ । कार्यक्रममा सरोकारवाला निकायका प्रतिनिधि, राजनैतिक दलका प्रतिनिधि लगायतको सहभागिता रहेको थियो । बैठक अघि जिल्ला वन कार्यालयले बसामाडि र मनहरीमा गरेका वृक्षारोपणका कामको अवलोकन गरिएको थियो ।