जेसीजको रक्तदान र पौडी सम्पन्न

९ कार्तिक, हेटौँडा । हेटौँडा जेसीजको आयोजनामा जारी जेसीज सप्ताह कार्यक्रम अन्तर्गत मंगलबार रक्तदान तथा खुल्ला पौडी प्रतियोगिता सम्पन्न भएको छ ।  

मकवानपुरमा बढ्दै गएको रगतको मागलाई थोरै भएपनि समाधान गर्ने उद्देश्यले रक्तदान कार्यक्रम आयोजना गरेको कार्यक्रम संयोजक रोशन सापकोटाले बताए । उक्त रक्तदान कार्यक्रममा २८ जनाले रक्तदान गरेका थिए । हेटौँडा जेसीजका अध्यक्ष धर्मराज बानियाँको अध्यक्षतामा भएको कार्यक्रममा प्रमुख अतिथि नेपाल टेलिकम चौघडाको प्रमुख रामकृष्ण तिमल्सिनाको प्रमुख आतिथ्यता रहेको थियो । कार्यक्रममा स्वागत मन्तव्य मूल कार्यक्रम संयोजक विज्ञान रिमालले गरेका थिए ।

कार्यक्रममा जेसीजका पूर्व अध्यक्ष माधव न्यौपाने, गणेश श्रेष्ठ, निर्वतमान अध्यक्ष दिपकराज मिश्र, हेटौँडा लेडी जेसीजका अध्यक्ष शोभा खरेल लगायतको आतिथ्यता रहेको थियो । 
पौडीमा गोर्खाली प्रथम
मंगलबार नै भएको खुल्ला पौडी प्रतियोगितामा पारसकृष्ण गोर्खाली प्रथम, अजित मानन्धर द्वितीय र सुशिल कौडा तृतीय भएका थिए । प्रतियोगितामा प्रथम, द्वितिय र तृतीय भएकाहरुलाई शिल्ड, मेडल र प्रमाणपत्र प्रदान गरीएको थियो ।

मकवानपुरमा पहिलो पटक आयोजना गरेको खुल्ला पौडी प्रतियोगितामा १४ जना प्रतिस्पर्धीहरुले प्रतियोगितामा सहभागिता जनाएको कार्यक्रम संयोजक रुपकराज पौडेलले जानकारी दिए । उक्त प्रतियोगिताको बारेमा मूल कार्यक्रम सहसंयोजक पवनकुमार कंसाकारले प्रकाश पारेका थिए ।  हेटौडा जेसीजका अध्यक्ष धर्मराज बानियाँको अध्यक्षतामा भएको कार्यक्रममा समाजसेवी तथा शिक्षाविद्व पुरनबहादुर जोशीको प्रमुख आतिथ्यता रहेको थियो । कार्यक्रममा  जेसीआइ सेनेटर कविन सांगामीले स्वागत मन्तव्य व्यक्त गरेका थिए ।

कार्यक्रममा हेटौँडा जेसीजका पूर्व अध्यक्ष कृष्ण कटुवाल, काव्यमणी अधिकारी, कृष्णबहादुर कार्की, पौडी संघ मकवानपुरका अध्यक्ष सुभाष खतिवडा, बस्तीपुर जेसीजका अर्जुन केसी लगायतको आतिथ्यता रहेको थियो ।