बेचबिखनविरुद्धको अभियानबाट लाभ लिंदै बालबालिका

१० कार्तिक, हेटौँडा । बालकल्याण समाजले २०७२ साल बैशाख १२ गतेको भुकम्पपछि संचालन गरेको बेचबिखन विरुद्धको अभियानबाट ठिंगनका बालबालिकाले लाभ हासिल गरेका छन् । भुकम्पपछि बालबालिका बेचबिखन लगायतका जोखिममा पर्ने भएकाले संचालित अभियानबाट ठिंगनमा यस्ता घटना रोकथाममा सहयोग पुगेको समूहमा आवद्ध बालबालिकाले बताएका हुन् । 
अभियानबाट बाल अधिकार, बाल श्रम, बेचबिखन र बच्ने उपाय लगायतका विषयबारे जानकारी हासिल गरेको १५ बर्षिय चेतमान स्यांतानले बताए । चेतना अभावका कारण बाल अधिकार र बाल श्रमबारे कम जानकारी रहेकोमा बालकल्याण समाजले चेतना अभिबृद्धिमा सहयोग गरेको ठिंगन गाविसका सहायक लक्ष्मण घिमिरेले बताए । उनका अनुसार बाल कल्याण समाजले गाविस कार्यालयसँग समन्वय गरी काम गरेकाले पनि प्रभावकारी भएको छ । 
बाल कल्याण समाजले ठिंगनमा ९ वटा वडामा रहेको वडा नागरिक मञ्चलाई सामुदायिक सचेतना समूहको रुपमा विकास गरी सचेतनाको काम अघि बढाईरहेको सहजकर्ता स्मृति बजगाईले बताईन् ।  समाजले सामुदायिक परामर्श तथा संरक्षण केन्द्र संचालन गरी किशोरकिशोरीहरुका लागि जीवन उपयोगी सिप, सुनौलो भविष्य छनौट कार्यक्रम संचालन गरिरहेको छ । 
ठिंगनमा विभिन्न खाले जोखिममा रहेका २२ बालबालिकालाई शैक्षिक सामग्री सहयोग, २ जनालाई काठमाण्डौं र एक जनालाई हेटौँडामा बालश्रम गरिरहेको अवस्थामा उद्धार गरी विद्यालयमा अध्ययनको व्यवस्था मिलाएको र २ परिवारलाई पारिवारिक सहयोग अन्तरगत आयआर्जनका लागि भैसीको पाडी सहयोग गरेको बाल कल्याण समाजका संरक्षण अधिकृत रामप्रसाद दाहालले बताए । अभियानले बालबालिका बेचबिखन, बालश्रम र बाल अधिकार हननमा न्यूनिकरण गर्न सहयोग गर्ने दाहालको दावि छ ।