मकवानपुरमा ६८ डेंगुका विरामी

१ मंसिर, हेटौँडा । मकवानपुरमा पछिल्लो पटक ६८ जना डेंगुका विरामी फेला परेको जिल्ला स्वास्थ्य कार्यालय मकवानपुरले जनाएको छ । बुधबार पत्रकार सम्मेलन गरी कार्यालयले हेटौँडा अस्पतालमा भएको परिक्षणमा ३० र नीजि स्वास्थ्य संस्थामा भएको परिक्षणमा ३८ जनामा डेंगु फेला परेको जनाएको हो ।
कार्यालयले डेंगुका कारण मकवानपुरमा कसैको पनि मृत्यु नभएको समेत पुष्टि गरेको छ । डेंगु फेला परेका सबैको अवस्था सामान्य रहेको र धेरैजसो उपचारपछि फर्किसकेको जिल्ला स्वास्थ्य कार्यालय मकवानपुरका प्रमुख रामचन्द्र पाठकले बताए । ‘अहिले सबै विरामी डेंगुको आशंकामा हेटौँडा अस्पतालमा जाँचका लागि आउने गर्नु भएको छ ।’–उनले भने–‘हामीले उहाँहरुको आंशका निवारण गरेर पठाउने गरेका छौं ।’
पाठकले शंका लागे रगत परिक्षण गर्न सुझाव दिंदै रगत परिक्षणमा प्लेटलेटको १ लाख ५० हजार काउन्ट र डव्ल्युविसी ४ हजार काउन्ट भन्दा कम पाईए डेंगुको परिक्षण गर्न सुझाव दिएका छन् । डेंगु परिक्षण गर्ने किटको अभाव रहेको भन्दै सबैलाई परिक्षण गर्न सम्भव नभएकाले रगत परिक्षणपछि मात्रै डेंगु परिक्षण गरिएको उनको भनाई छ । अहिले अस्पतालमा ७४ वटा डेंगु परिक्षण किट रहेको उनले जानकारी दिए ।
‘धेरै जना मलाई डेंगु भयो कि भनेर आत्तिने गर्नुहुन्छ, यसमा आत्तिनु पर्ने अवस्था छैन, सामान्य सावधानीबाट डेंगु ज्वरो निको हुन्छ ।’–पत्रकार सम्मेलनमा पाठकले भने । उनले डेंगु ७ दिनमा निको हुने भएकाले आत्तिनु नपर्नेमा जोड दिंदै सावधानी भने अपनाउन आग्रह गरे ।
मकवानपुरमा डेंगुले महामारीको रुप नलिएको जिल्ला स्वास्थ्य कार्यालयका जनस्वास्थ्य निरिक्षक भोला चौलागाईले बताए । उनले आप्mनो आसपासमा पानी जम्न नदिने, लामखुट्टे मार्ने जस्ता काम गर्न आग्रह गर्दै यसका लागि स्वास्थ्य कार्यालयले समेत विभिन्न निकायको समन्वयमा काम थाल्ने बताए । नेपालमा २०६२ सालबाट डेंगुका विरामी फेला परेको र २०६५ सालदेखि मकवानपुरमा डेंगु देखा परेको स्वास्थ्य कार्यालयले जनाएको छ ।
नेपालमा चितवन, झापा र कैलालीमा बढि प्रभाव रहेको डेंगु मकवानपुरमा शुरुमा २०७० सालमा मनहरी र त्यसपछि फापरवारी, हेटौँडा बजार लगायतका क्षेत्रमा देखा परेको कार्यालयले जनाएको छ ।