फेकोफनद्वारा ३ पत्रकारसहित १५ जना सम्मानित

२९ मंसिर, हेटौँडा । सामुदायिक वन उपभोक्ता महासंघ (फेकोफन) मकवानपुरले ३ पत्रकारसहित १५ जनालाई सम्मान गरेको छ । फेकोफन मकवानपुरले प्रथम जिल्ला परिषदको अवसरमा बुधबार विभिन्न विधामा १५ जनालाई सम्मान गरेको हो ।
कार्यक्रमका प्रमुख अतिथि संस्कृति, पर्यटन तथा नागरिक उड्डयन राज्यमन्त्री ईन्द्रबहादुर बानियाँले संचारकर्मीहरु भीमसेन पौडेल, रुपेश दुलाल, अशोकसुजन श्रेष्ठलाई सम्मान गरेका थिए । त्यसैगरी, कार्यक्रममा सर्वमान्य गणेशमानसिंह वन संरक्षण पुरस्कार प्राप्त गर्न सफल हेटौँडा–६ को रानी सामुदायिक वन उपभोक्ता समूह, हेटौँडा–६ कै चुच्चेखोला सामुदायिक वन उपभोक्ता समूह, हेटौँडा–१,२ को सुन्दर सामुदायिक वन समूह, वन सदुपयोगतर्फ थाहा नगरपालिकामा रहेको ऋषेश्वर सामुदायिक वन समूह, मनहरीमा रहेको सिमपानी देवकोट संयुक्त सामुदायिक वन समूह सम्मानित भएका छन् ।
हेटौँडा–७ मा रहेको न्यूरेनी चिसापानी सामुदायिक वन उपभोक्ता समूह, हेटौँडा–९ मा रहेको बेतखोल्सी सामुदायिक वन उपभोक्ता समूह, हेटौँडा–१० मा रहेको भुटनदेवी सामुदायिक वन उपभोक्ता समूह र छतिवनमा रहेको सिमातमाई सामुदायिक वन उपभोक्ता समूहलाई सम्मान गरिएको छ । कार्यक्रममा फकोफन केन्द्रिय कार्यालय, वन प्राविधिकतर्फ अच्युतप्रसाद लामिछाने र नवराज पुडासैनीलाई समेत सम्मान गरिएको थियो ।