आधुनिकमा २० को उम्मेदवारी, आजदिनभर फिर्ता लिने समय

१ पुस, हेटौँडा । मकवानपुरकै चर्चित सामुदायिक विद्यालय आधुनिक राष्ट्रिय माविमा चुनावी माहोल तातेको छ । विद्यालय व्यवस्थापन समिति गठनका लागि अहिले माहौल तातेको हो ।

विद्यालय व्यवस्थापन समितिमा आवश्यक ४ पदका लागि २० जनाको उम्मेदवारी परेको छ । २ महिला र २ पुरुष आवश्यक पर्ने समिति सदस्यमा १२ महिला र ८ पुरुषले उम्मेदवारी दिएका छन् । अभिभावक भेलामा आफुलाई आकांक्षीको रुपमा २० जनाले उम्मेदवारी दिएका छन् । पुरुषततर्फ भुमिनन्द गौतम, अर्जुन ढुंगाना, रामप्रसाद कालाखेती, रमेश कोइराला, सञ्जिव श्रेष्ठ, रमेशप्रसाद न्यौपाने, नरहरी महत र चित्तबहादुर विकले उम्मेदवारी दिएका छन् । महिलातर्फ गोरीमाया लामा, यक्षकुमारी थापा, मन्दिरा घिमिरे, शान्तकुमारी खड्का, मञ्जु गुप्ता, रमा नेपाल, अप्सरा ढकाल, जिना सुनार, शान्ति पौडेल, उर्मिला नेपाल, रेणुका फुँयाल वाईवा र लक्ष्मी गौतम रहेका छन् ।उम्मेदवारको उम्मेदवारी फिर्ताका लागि शुक्रबार अपरान्ह ४ बजेसम्मको समय दिईएको छ । दलिय भागबण्डाका आधारमा आफ्नो पक्षमा नेतृत्व लिनका लागि अहिले प्रमुख दलहरु नेपाली काँग्रेस, नेकपा एमाले, माओवादी केन्द्र, राप्रपा छलफलमा जुटेको एक उम्मेदवारले जनाए ।

निर्वाचन प्रक्रिया अनुसार २ महिला र २ पुरुष निर्वाचन प्रक्रिया अनुसार छनौट हुनेछन् भने एक महिला र एक पुरुष समितिले मनोनित गर्नेछ । प्रधानाध्यापक सदस्य सचिव रहन्छन् भने एक शिक्षक प्रतिनिधि रहने छन् । ८ जनाको समितिको निर्णयबाट अध्यक्ष चयन हुनेछन् । देशमै चर्चा कमाएको विद्यालयको नेतृत्वमा दावि गरिरहेका उम्मेदवारहरुले पनि राजनैतिक ढंगबाट लविङलाई तिब्र पारेका छन् ।

यसअघि अध्यक्ष भएका चित्तबहादुर विक र यसअघि दावि गरेका नरहरी महतले आफ्नो पक्षमा माहोल जुटाउन दौडधुपमा लागेको जनाईन्छ । अन्य उम्मेदवार सर्वसम्मतिबाट समिति गठनको मनस्थितिमा रहेका छन् ।