हरियो वन कार्यक्रमको समिक्षा तथा समापन

भीमसेन पौडेल
१० पुस, हेटौडा । अमेरिकी सहयोग नियोग युएसआइडी को सहयोगमा सञ्चालित हरियो वन कार्यक्रमको अवधि सकिएको छ ।
सन २०१२ अगस्तदेखि सञ्चालित यो परियोजना २०१६ अगस्तमा सकिएको हो । कार्यक्रमले २९ वटा जिल्लामा सुशासन,जलवायु परिवर्तन, आयआर्जन, विधान कार्ययोजना नवीकरण, सिचाई, तटवन्धन, खानेपानी लगायतका क्षेत्रहरुमा कार्य गरेको शनिवार हेटौडामा भएको  समीक्षा बैठकमा जानकारी गराईएको थियो ।

करिब ४ करोड अमेरीकी डलर खर्च गरिएको कार्यक्रमले अपेक्षा गरेको उपलव्धी हासिल भएको हरियो वन कार्यक्रमका सन्दिप शर्माले बताए । मकवानपुरमा सामुदायिक वन उपभोक्ता महासंघ (फेकोफन) नारी सीप सिर्जना केन्द्र र अस्मिता नेपालले कार्यक्रमको सहजीकरण गरेका थिए ।कार्यक्रम हेटौडा उपमहानगरपालिका, मनहरी, हाँडीखोला र चुरियामाई गाविसमा सञ्चालन गरिएको थियो ।

समिक्षा तथा समापन कार्यक्रममा सामुदायिक वन उपभोक्ता महासंघकी कार्यक्रम सहयोगी रेनुका लामाले हरियो वनको कार्यक्रम अन्तरगत संचालित कार्यक्रमहरुको बारेमा जानकारी गराएकी थिईन् । मकवानपुरमा महासंघले करिब ५९ लाख बराबरको कार्यक्रम सञ्चालन गरेको महासंघकी अध्यक्ष पञ्चमाया स्यांतानले बताईन् ।

कार्यक्रममा जिल्ला विकास समितिका सामाजिक विकास अधिकृत रामकृष्ण थापा, जिल्ला वन अधिकृत राजेन्द्र न्यौपाने, पशु सेवा कार्यालयका प्रमुख डा. सन्जीव प्रधान, वनस्पती कार्यालयका प्रमुख नरहरी चापागाई,मकवानपुर वन प्राविधिक समाजका अध्यक्ष पुष्पराम थापा, विभिन्न सरकारी कार्यालय, सामुदायिक वन समूहका प्रतिनिधि र सञ्चारकर्मीहरुको सहभागिता थियो ।