जम्मू–कश्मीरमा भारतले डरलाग्दो खेल खेल्योः पाकिस्तानी विदेश मन्त्री

२० साउन, हेटौँडा । जम्मू–कश्मीरका विषयमा भारतीय सरकारले चालेको कदमको पाकिस्तानले आलोचना गरेको छ ।  पाकिस्तानी विदेश मन्त्री शाह मोहम्मद कुरैशीले धारा ३७० हटाउने निर्णय त्यस क्षेत्रकै लागि भयानक भएको दावी गरेका छन् ।
विदेश मन्त्री कुरैशीले भारतले डरलाग्दो खेल खेलेको उल्लेख गर्दै यसको असर पुरै क्षेत्रमा भयानक हुन सक्ने चेतावनी दिएका छन् ।
पाकिस्तानी प्रधानमन्त्री इमरान खानले कश्मीर मुद्दालाई समाधानको बाटोमा लैजान चाहेको बताउँदै मन्त्री मोहम्मदले भारतको कदमले यसलाई जटिल बनाइ दिएको दावी गरेका छन् ।
भारतीय गृह मन्त्री अमित शाहले जम्मू–कश्मीरको लागि सोमबार ऐतिहासिक प्रस्ताव पेस गरेका छन् । उनले अनुच्छेद ३७० हटाउनको लागि सिफरिस गरेका छन् ।
यो निर्णयलाई राष्ट्रपतिले पनि मन्जुरी दिएका छन् । बहुजन समाजवाद पार्टीले पनि समर्थन दिएको छ । गृहमन्त्रीको यो जवाफपछि राज्यसभामा हंगामा नै सुरु भएको छ ।
राष्ट्रपतिको मन्जुरीपछि पनि अनुच्छेद ३७० को सबै खण्ड भने लागू हुने छैन । यसको मात्र एक खण्ड मात्र लागू हुनेछ । गृहमन्त्री शाहले जम्मू–कश्मीरको पुनर्गठन गर्ने विधेयक पेस गरेका छन् ।
जम्मू–कश्मीरलाई केन्द्रशासित प्रदेशको दर्जा दिँदै यसले पाएको विशेष राज्यको दर्जा खोसिएको छ । त्यस्तै जम्मू–कश्मीरको लद्दाख पनि अब छुट्टै केन्द्रशासित प्रदेश बन्नेछ ।
अनुच्छेद ३५ ए को विशेषाधिकार पनि जम्मू–कश्मीरबाट खोसिएको छ । जम्मू(कश्मीरमा विधान सभा भए पनि लद्दाख भने बिनाविधान सभाको हुनेछ । (साभारःउज्याले अनलाईन)