सरकारको लक्ष्य अनुसार काम गर्नुसः मुख्यमन्त्री पौडेल

२२ साउन, हेटौँडा । प्रदेश ३ का मुख्यमन्त्री डोरमणी पौडेलले प्रदेश सरकारको लक्ष्य र अभियानलाई ध्यानमा राखेर काम गर्न कर्मचारीहरुलाई निर्देशन दिएका छन् ।
मंगलबार भूमि व्यवस्था कृषि तथा सहकारी मन्त्रालय अन्तर्गतको पशुपक्षी तथा मत्स्य विकास निर्देशनालयको बार्षिक समिक्षा गोष्ठिमा बोल्दै मुख्यमन्त्री पौडेलले कर्मचारीहरुलाई यस्तो निर्देशन दिएका हुन् । 
उनले सरकारले पटक पटक सुचित गराउँदै आएपनि अख्तियारको स्टिङ अप्रेशनमा प्रदेशका कर्मचारी कारबाहीमा पर्नु दुखद् रहेको बताउँदै प्रदेश सरकारले लिएको शुन्य शहनशीलता र भ्रष्टाचार मुक्त प्रदेश अभियानलाई आत्मासात गर्न निर्देशन दिए ।
मन्त्रालयले मंगलबार अघिल्लो बर्ष गरेका बार्षिक कामहरुको समिक्षा गरेको छ । कार्यक्रममा नीतिगत जटिलताका बाबजुत मन्त्रालयले करीब ८० प्रतिशत बजेट खर्च गर्न सफल भएको जानकारी गराइएको थियो ।
कार्यक्रममा बार्षिक प्रतिवेदन प्रस्तुत गर्दे निर्देशनालयका प्रमुख रामप्रसाद सुबेदीले प्रदेशमा पशुपक्षी जन्य उत्पादनमा क्रमश बृद्धि हुँदै गएको तथ्याङ्क प्रस्तुत गरेका थिए ।
कार्यक्रममा कृषि मन्त्री दावा दोर्जे लामा, प्रदेशका मुख्य सचिव आनन्दराज ढकाल, मुख्यमन्त्रीका प्रमुख राजनितिक सल्लाहकार जेएन थपलिया, कृषि मन्त्रालयका सल्लाहकार रामकुमार केसी लगाएतले मन्तव्य व्यक्त गरेका थिए ।