औषधी र सेवा सहज गर्न बनाउन तरुण दलको सुझावपत्र

२२ साउन, हेटौंडा । हेटौंडा अस्पतालको सेवा प्रवाहमा भइरहेको कमजोरीलाई सच्चाउन आग्रह गर्दै नेपाल तरुण दल मकवानपुरले बुधबार अस्पताल प्रशासनलाई सुझावपत्र बुझाएको छ । अस्पतालमा तरुण दल मकवानपुरले स्थलगत अवलोकन गर्दा धेरै कमी कमजोरी भेटिएको भन्दै तरुणले अस्पताल अध्यक्ष तथा मेडिकल सुपरिटेन्डेन्टलाई सुझावपत्र पेश गरेको हो । 
स्वास्थ्य जस्तो महत्वपूर्ण क्षेत्रको सेवा प्रवाहलाई चुस्त दुरुस्त पारी नागरिकको स्वास्थ्य अधिकारको रक्षा गर्नु अस्पतालका कर्मचारी, डाक्टर, अस्पताल प्रशासनलगायत सरोकारवालाको दायित्व भएको भन्दै तरुण दल मकवानपुरका अध्यक्ष ईश्वर पाठकले अस्पताल सञ्चालन व्यवस्थापन समितिका अध्यक्ष प्रकाश पौडेल र निमित्त मेडिकल सुपरिटेन्डेन्ट डाक्टर प्रविण श्रेष्ठलाई चार बुँदे सुझावपत्र हस्तान्तरण गरेका हुन् ।
अस्पतालमा आउने बिरामीको चाप धेरै हुँदा शुल्क बुझाउन, डाक्टर कुर्न तथा औषधि लिन घण्टौं लाइन बस्नुपर्ने अवस्था आएकाले काउन्टर संख्या बढाई छिटो र सहज सेवा दिन तथा जनशक्ति थप गर्न तरुणले सुझाव दिएको छ । साथै अस्पतालमा निःशुल्क दिनुपर्ने ७० प्रकारका औषधिहरुमध्ये सबै औषधि उपलब्ध नहुने गरेकाले औषधिको व्यवस्था गर्न पनि माग गरिएको छ । 
अस्पतालमा रेबिज, टिटनाशक जस्ता रोगविरुद्धको सुई उपलब्ध नहुँदा बिरामी मर्कामा परेको विषयमा पनि तरुणको ध्यानाकर्षण भएको छ । अस्पताल परिसर, बिरामी कक्ष, शौचालयलगायतका स्थानमा प्रयाप्त सरसफाई नभएको पाइएकाले त्यतातर्फ पनि ध्यान दिन आग्रह गरिएको छ । तरुणले यसअघि गरेको ध्यानाकर्षणबाट अस्पतालमा एटिएम सेवा, टिकटमा टोकन प्रणालीलगायतका सेवा सुधार भएको भन्दै अन्य कमजोरीहरु पनि सच्याउँदै अघि बढ्न आग्रह गरिएको छ ।
सुझावपत्र बुझाउने कार्यक्रममा तरुण दल मकवानपुरका सचिवद्वय सचित थापा, सन्तोष सापकोटा, सहसचिव निरशंकर लामा, सदस्य राजु नेपाल, सञ्जय पाठकलगायतको उपस्थिति रहेको थियो ।