बिल क्लिन्टन र मोनिका लिविन्स्कीको विषयमा टेलीसिरियल बन्ने

File Photo

२३ साउन, हेटौँडा । अमेरिकाका तत्कालीन राष्ट्रपति बिल क्लिन्टन र उनकी इन्टर्न मोनिका लिविन्स्कीबीचको अफेयर र महाभियोग प्रक्रियालाई नाटकीय प्रस्तुती गरिएको सामग्री अमेरिकी टेलिभिजनमा प्रसारण हुने भएको छ ।
अमेरिकी क्राइम स्टोरीको शृंखलाबद्ध प्रस्तुती अन्तर्गत सो नाटक टेलिभिजनमा प्रस्तुत हुन लागेको हो । त्यसको धारावाहिक प्रस्तुती अमेरिकामा आगामी वर्ष हुन लागेको राष्ट्रपति चुनावको समयमा हुने बताइएको छ । 
एफ एक्स शो नामको सो कार्यक्रमको प्रोडुसरको टोलीमा स्वयं लिविन्स्कीपनि रहने छिन् । सन् १९९९मा सो घटना विश्वकै चर्चाको विषय भएपनि त्यसपछि त्यो सेलाएको थियो ।  
लिविन्स्की पनि सार्वजनिक चर्चामा त्यति थिइनन् । नाटकमा नायिका बिनी फेल्डस्टेनले लिविन्स्कीको भूमिकामा खेल्ने भएकी छन् । 
सराह पाउल्सनले लिन्डा ट्रिपको भूमिका खेल्नेछन् । लिन्डा नामकी कर्मचारीले त्यतिबेला लिविन्स्कीको राष्ट्रपतिसँगको  प्राइभेट फोन कल रेकर्ड गरेकी थिइन् । 
बिल क्लिन्टन र हिलारीको भूमिकामा कसले खेल्ने भन्ने बारेमा अझै खुलिनसकेको जनाइएको छ । लिविन्स्की अहिले ४६ वर्षकी भएकी छन् । त्यतिबेला २२ वर्षको उमेरमा आफू भन्दा २७ वर्ष बढी उमेरका क्लिन्टनसँग सम्बन्धमा रहेकी थिइन् । (बाह्खखरी)