मूख्यमन्त्री भन्छन्–‘हेटौँडामा २५ हैन १६ मिटर भत्किन्छ’

२५ साउन, हेटौँडा । प्रदेश नम्बर ३ का मुख्यमन्त्री डोरमिण पौडेलले हेटौंडा सडक विस्तार २५ मिटर नभई १६ मिटर हुने दावि गरेका छन् । जिल्ला समन्वय समिति मकवानपुरको चौथो जिल्ला सभामा आइतबार बोल्दै मूख्यमन्त्री पौडेलले हेटौँडामा २५/२५ मिटर सडक विस्तार नहुने बताएका हुन् । 
उनले १६/१६ मिटर सडक विस्तार गर्ने र बाईपास निर्माण हुने बताउँदै बाईपासका लागि प्रदेशबाट २० करोड रुपैँया विनियोजन गरेको बताए । आफ्नो घर समेत हेटौँडा बजारमा रहेको भन्दै उनले १६ मिटर विस्तारका क्रममा पहिलो घर आफ्नै भत्काउने बताए । 
२५ मिटर सडक विस्तार गर्नुपर्छ भन्नु जनताप्रतिको वेईमानी हुने बताउँदै सडक विस्तारले हेटौँडामा आर्थिक संकटको अवस्था आउने समेत उनले दावि गरे । २५ मिटर सडक विस्तार भए आफु नै ‘कुम्लो’ बोकेर हिड्ने उनले बताए । उनले प्रदेश राजधानीको टुंगो लगाउने विषय प्रदेशसभाको भएको भन्दै यसलाई दुईतिहाईले निर्णय गर्ने बताए । दुई तिहाईले निर्णय गर्दा राजधानी प्रदेशको जुनसुकै स्थानमा हुन सक्ने उनको भनाई थियो ।
समन्वय समितिका सभापति रघुनाथ खुलालको सभाध्यक्षतामा भएको कार्यक्रममा प्रदेशसभा सदस्य सन्तबहादुर चेपाङ, मूख्यमन्त्री कार्यालय प्रमुख सचिव आनन्दराज ढकाल, नेकपा पोलिटव्युरो सदस्य केदार न्यौपाने, कांग्रेस प्रवक्ता प्रदिप कोइराला, नेकपा नेता बद्री लम्साल, राप्रपा अध्यक्ष मधु अधिकारी, जिसस काभ्रका सभापति उद्धव केसी लगायतले मन्तव्य व्यक्त गरेका थिए ।