अन्तराष्ट्रिय शान्तिसुरक्षामा खतरा बढ्योः रुस र चीन 

५ भदौ, हेटौँडा । अन्तराष्ट्रिय शान्तिसुरक्षामा खतरा बढेको भन्दै रुस र चीनले संयुक्त राष्ट्रसंघलाई सुरक्षा परिषद्को बैठक बोलाउन आग्रह गरेका छन् । 
संयुक्त राज्य अमेरिकाले मध्यम दूरीका मिसाइल बनाउने र प्रक्षेपण गर्ने योजना सार्वजनिक गरेपछि मस्को र बेइजिङले संयुक्त राष्ट्र संघलाई बिहीबार यस्तो आग्रह गरेका हुन् । 
मस्को र बेइजिङले १५ सदस्यीय परिषद् बैठकमा ’अन्तर्रा्ष्ट्रिय शान्ति र सुरक्षामा खतरा’ एजेन्डामा छलफल गर्न चाहेको बताएका हुन् । 
रोयटर्सका अनुसार दुबै राष्ट्रले संयुक्त राष्ट्रसंघको निःसशस्त्रिकरण मामिला प्रमुख इजुमी नाकामित्सुलाई समेत यस विषयमा जानकारी गराएका छन् । 
संयुक्त राज्य अमेरिकाको रक्षा विभागले सोमबार यसअघिको सम्झौता अनुसार क्रुज मिसाइल परीक्षण गरेको घोषणा गरेको थियो । शीतयुद्धका समयमा गरिएको इन्टरमिडियट(रेन्ज न्युक्लियर ट्रिटीपछिको पहिलो मिसाइ परीक्षण भएको बताइएको छ । 
बुधबार फक्स न्यूजसँगको अन्तर्वार्तामा अमेरिकी रक्षामन्त्री मार्क इस्पेरले चीन, रुस र उत्तर कोरियालाई चेतावनीको सन्देश प्रवाह गर्न उक्त परीक्षण गरिएको र जसमा पनि चीनलाई मुख्य जोड दिइएको बताएका थिए ।