३ नम्बर प्रदेशको राजधानीबारे मूख्यमन्त्री पौडेल मौन

१२ भदौ, हेटौँडा । ३ नम्बर प्रदेशको स्थायी राजधानी र नामबारे मूख्यमन्त्री डोरमणी पौडेल मौन बसेका छन् ।
विहिबारको प्रदेशसभा बैठकमा भदौ ८,९, १०, ११ र १२ गतेको विशेष र शुन्य समयमा प्रदेशसभा सदस्यहरुले राखेका प्रश्नहरुको जवाफ दिने क्रममा मूख्यमन्त्री पौडेल प्रदेशको राजधानीबारे मौन बसेका हुन् । 
उनले विभिन्न विषयको बारेमा सदस्यहरुको जिज्ञासाको जवाफ दिएपनि राजधानी र नामबारे जवाफ दिएनन् । विशेष र शुन्य समयमा प्रतिपक्षी दलका सांसदहरुले मात्रै नभई सत्ता पक्षीय सांसदहरुले समेत राजधानी र नाम छिटो टुंग्याउन माग गरेका थिए । उनीहरुले के कारण राजधानीको टुंगो लगाउन नसकिएको हो भनि सरकारसंग जवाफ माग गरेका थिए । 
संसदमा मूख्यमन्त्री पौडेलले राजधानी र नामबारे जवाफ नदिएको भन्दै सत्तापक्षीय एक सांसदले आक्रोश पोखेका छन् । ‘संसदमा सांसदहरुले राजधानी र नामबारे प्रश्न उठाएपनि मूख्यमन्त्रीले वेवास्ता गर्नु दुःखद हो ।’–उनले भने–‘यसबाट मूख्यमन्त्री नेतृत्वको सरकार सांसदलाई गुमराहमा राख्न चाहन्छ भन्ने स्पष्ट हुन्छ ।’
बैठकमा मूख्यमन्त्री पौडेलले चीनको गान्सु प्रान्तमा गरेको भ्रमणको जानकारी गराएका थिए । उनले असार अन्तिम सातादेखिको प्राकृतिक विपदमा परी ३ नम्बर प्रदेशमा २५ जनाको मृत्यु भएको र १७ परिवारलाई १ लाख रुपैँयाको दरले राहत उपलव्ध गराईएको बताए । विपदमा क्षति भएका सडक सञ्चालनका लागि प्रति जिल्ला १ करोड रुपैँयाका दरले १३ करोड रुपैँया निकासा भएको जानकारी दिए ।