दुई तिहाईको सरकारको सरकारी सम्पतीमाथि ब्रम्हलुट: नेता बानियाँ

२२ भदौ, हेटौंडा। नेपाली कांग्रेस ३ नम्बर प्रदेशका संसदीय दलका नेता एवं कांग्रेस मकवानपुरका सभापति ईन्द्रबहादुर बानियाँले कम्युनिष्ट सरकार अहिले दुई तिहाईको दम्भ र बलमिच्याईमा सरकारी सम्पतिमा ब्रम्हुलट मच्चाउन र हडप्ने दाउमा लागी परेको आरोप लगाएका छन्।

नेपाली कांग्रेसनिकट नेपाल आदिवासी जनजाति विभागको बाग्मती गाउँपालिकास्तरीय भेला तथा संगठन सुदृढिकरण कार्यक्रममा बोल्दै नेता बानियाँले कम्युनिष्ट सरकारले कांग्रेस सुतेर बसेको ठान्दै मुडे बलमा एकपछि अर्को राष्ट्रघाती निर्णय गर्दै हिडेको आरोप लगाउँदै कांग्रेसलाई सुतेको नठान्न चेतावनी दिएका छन्।

कार्यक्रममा बोल्दै नेता बानियाँले कांग्रेसको भदौ २४ गतेबाट हुने दोश्रो चरणको जागरण अभियानमार्फत सशक्त ढंगले अघि बढ्ने र यो सरकार अझै नसुध्रिए तेश्रो चरणको जागरण अभियानबाट सरकारलाई ठूलै धक्का दिने बताएका छन्।  विभागका जिल्ला संयोजक भीमबहादुर भोम्जनको सभाध्यक्षतामा भएको कार्यक्रममा नेता बानियाँको प्रमूख आतिथ्यता रहेको थियो। कार्यक्रममा आदिवासी जनजाति र तामाङ संघ बाग्मती गाउँपालिकास्तरीय समिति समेत गठन गरेको छ ।

कार्यक्रममा छविलाल भोम्जनका अध्यक्षतामा २१ सदस्यीय नेपाल आदिवासी जनजाति संघ र डम्बरबहादुर भ्लोनको अध्यक्षतामा ९ सदस्यीय बाग्मती गाउँपालिकास्तरीय नेपाल तामाङ संघसमेत गठन गरिएको छ ।

गाउँपालिकास्तरीय भेला तथा संगन सुदृढिकरण कार्यक्रममा जिल्ला पार्टी सचिव एवं प्रशिक्षण विभाग प्रमूख बुद्ध लामा, जिल्ला सदस्यहरु कृष्णप्रसाद दाहाल, राजिव सुवेदी, चोकबहादुर ठाडामगर, भीमसेन महत, महासमिति सदस्य धर्मराज लामिछाने, हेटौंडा उपमहानगर सभापति आनन्दराम पराजुली, शेरबहादुर लामा, गढी गाउँपालिका संयोजक दोर्जे लामा स्याङतान, नेपाल तामाङ संघका जिल्ला अध्यक्ष चम्फुरत्न लामा, डिल्लीप्रसाद घोरासैनी, फणिन्द्र तिमल्सिनालगायतले मन्तव्य व्यक्त गरेका थिए।