५ सामुदायिक वनमा सालकसम्बन्धी होर्डिङ बोर्ड

सालकसम्बन्धी सचेतनामुलक होर्डिङ बोर्ड राख्दै रानी वनका उपभोक्ता केदार अधिकारी ।

२८ पुस, हेटौँडा । मकवानपुरका ५ सामुदायिक वनमा सालक संरक्षणसम्बन्धी सचेतनामुलक होर्डिङ बोर्ड राखिएको छ । चितवनमा रहेको राष्ट्रिय प्रकृति संरक्षण कोषको सहयोगमा होर्डिङ बोर्ड राखिएको हो ।

हेटौँडा–६ चौघडामा रहेको रानी सामुदायिक वन, चुच्चेखोलामा रहेको चुच्चेखोला सामुदायिक वन, हेटौँडा–७ मा रहेको न्यूरेनी चिसापानी सामुदायिक वन, हेटौँडा–५ मा रहेको पिप्लेपोखरा सामुदायिक वन र हेटौँडा–२० राजदेवीमा रहेको अशोक सामुदायिक वन उपभोक्ता समूहमा सचेतनामुलक होर्डिङ बोर्ड राखेको रानी वनका कार्यालय सचिव भीमसेन पौडेलले बताए । बोर्डमा सालकको महत्व, यसको अवस्था, संरक्षण, आहार, चोरीशिकार नियन्त्रण, कानूनी प्रावधान लगायतको बारेमा जानकारी दिईएको छ ।

विश्वमा दुर्लभ एवं संरक्षित सूचिमा रहेको सालक मकवानपुरका विभिन्न सामुदायिक वनहरुमा पाईने भएकाले यसको संरक्षणका लागि कार्यक्रम संचालन गरेको कोषका परमानन्द झाले बताए । यसअघि कोषले सालकसम्बन्धी सचेतनामुलक तालिम गोष्ठी र क्यामारा ट्रयापिङको काम समेत गरेको थियो । कोषले आगामी दिनमा सालकसम्बन्धी थप कार्यालय गर्ने झाले जानकारी दिए ।

मकवानपुरमा रानी सामुदायिक वनले २०६३ सालमा पहिलो पटक सालक संरक्षणको काम शुरु गरेको थियो ।