भावनात्मक एकता भएको दिन कांग्रेस ठुलो पार्टीः माहामन्त्री कोइराला

२४ भदौ, हेटौंडा । नेपाली कांग्रेसका महामन्त्री डा. शशांक कोईरालाले कांग्रेस भावनात्मक रुपमा एकता भएको दिन मुलुककै सबैभन्दा ठूलो पार्टी बन्ने दावी गरेका छन् ।
प्रजातान्तिक विचार समाज प्रदेश तीनले आयोजना गरेको भावी अर्थनीति र प्रजातान्त्रिक समाजवाद विषयक अन्तक्र्रिया कार्यक्रममा बोल्दै महामन्त्री डा. कोइरालाले यतिवेला कांग्रेसमा बीपीको विचारको खडेरी परेको भन्दै सबैलाई बीपीको विचारमा गोलबद्ध हुन आग्रह गरे ।
उलने नेपाली कांग्रेसले आफ्नो अगुवाईमा जारी गरेको संविधानको अक्षरस पालना गर्ने पनि बताउँदै अन्य विद्रोही समूहले जस्तो नेपाली कांग्रेसले बन्द, हड्ताल, चक्काजाम नगर्ने स्पष्ट पारे ।
नेपाली कांग्रेसका संस्थापक सभापति एवम पहिलो जननिर्वाचित प्रधानमन्त्री बीपी कोइरालाका एक सय ६ औं जन्मजयन्तिको अवसरमा आयोजित कार्यक्रममा बोल्दै नेपाली कांग्रेस मकवानपुरका सभापति एवम् प्रदेश ३ का संसदीय दलका नेता ईन्द्रबहादुर बाँनियाले प्रजातन्त्र र समाजवाद वी.पी.को आदर्श रहेको र सोहीअनुरुप धनी र गरिबबिचको खाडल पुरिने गरि काम गर्नुपर्ने बताए । 
कार्यक्रममा प्रजातान्त्रिक विचार समाजका केन्द्रीय अध्यक्ष डा. केदारनरसिंह केसी, विचार समाजका वरिष्ठ उपाध्यक्ष कुलचन्द्र वाग्ले, महिला उपाध्यक्ष डा. विमला शाक्य, महासचिव गोकर्ण अर्याल, मकवानपुर जिल्लाका पार्टीका उपसभापति विष्णुप्रसाद लामिछाने, प्रवक्ता प्रदिप कोइराला लगायत जिल्ला तहका नेताहरुको उपस्थिती रहेको थियो । 
समाजका प्रदेश ३ संयोजक भरतप्रसाद दवाडीको सभाअध्यक्षतामा भएको कार्यक्रममा वीपीको विषयमा अर्थविद् डा. नारायण नरसिंह खत्रीले आफ्नो कार्यपत्र प्रस्तुत गरेका थिए ।