परिणाम आउने काम मात्रै गर्छौं : मूख्यमन्त्री पौडेल

१० असोज, हेटौँडा । ३ नम्बर प्रदेशका मूख्यमन्त्री डोरमणी पौडेलले प्रदेश सरकार परिणाममुखी काम मात्रै गर्ने ढंगले अघि बढेको बताएका छन् ।
हेटौँडामा शुक्रबार प्रदेश विकास परिषदको प्रथम बैठकमा बोल्दै उनले प्रदेश सरकारले परिणाम नआउने काम नगर्ने दावि गरे ।

उनले सरकारले सबैको सहयोगमा विकासको काम अघि बढाएको भन्दै रचनात्मक कामको प्रशंसाका लागि आग्रह गरे । नीजि क्षेत्रको समेत संलग्नतामा विकासको अभियान अघि बढाउन प्रदेश सरकार तत्पर रहेको उनको भनाई थियो । ‘६२ प्रतिशत लगानी त नीजि क्षेत्रसंग अपेक्षा गरेका छौं, त्यही आधारमा बजेट निर्माण भएको छ ।’–उनले भने–‘त्यसैले नीजि क्षेत्रलाई साईडमा राख्ने वा पाखामा पार्ने काम गर्दैन, म विश्वास दिलाउन चाहन्छु ।’

पछिल्लो समय सरकारलाई गाली मात्रै गर्ने प्रवृत्ति देखा परेको भन्दै परिषदका अध्यक्ष समेत रहेका पौडेलले यस्तो प्रवृत्ति त्यागेर सबैले आफुलाई बदल्नु जरुरी रहेको बताउनुभयो । ‘हुँदा हुँदा हावाहुरी आयो भने पनि सरकारलाई गालि गर्ने अवस्था छ ।’–उनले भने–‘हिजोको त्यो मान्यता र संस्कृति छोड्दिउँ ।’ कार्यक्रममा प्रदेश आर्थिक तथा योजना मन्त्रालयका सचिव मुकुन्द पौडेल र प्रदेश नीति तथा योजना आयोगका सदस्य श्यामराज बस्नेतले कार्यपत्र प्रस्तुत गरेका थिए ।

बैठकमा सभामुख सानुकुमार श्रेष्ठ, काठमाडौं महानगरपालिकाका प्रमुख विद्यासुन्दर शाक्य, राष्ट्रिय योजना आयोगका सदस्य डा. रामकुमार फुँयाल, विकास परिषदका सदस्य कल्पना शर्मा, प्रदेशका प्रमुख सचिव तोयम राय लगायतले मन्तव्य व्यक्त गरेका थिए । बैठकमा सहभागी परिषदका सदस्यहरुले प्रदेश विकास परिषदले ल्याएको खाका सकारात्मक भएपनि प्रभावकारी कार्यान्वयन आवश्यक रहेकोमा जोड दिएका थिए ।