पञ्चकन्या आधारभूत विद्यालयमा विवाह !

११ माघ, हेटौँडा । हेटौँडा–२० गैरीगाउँमा रहेको पञ्चकन्या आधारभूत विद्यालयमा मंगलबार विशेष रौनक थियो । विद्यालयले विद्यालयका अभिभावक, छिमेकी विद्यालयका प्रतिनिधि, स्थानीय समाजसेवी, संचारकर्मी लगायतलाई आमन्त्रण गरेको थियो ।

शिक्षक र अभिभावक आमन्त्रित पाहुनालाई खुवाउन विभिन्न परिकार बनाउन व्यस्त देखिन्थे । विद्यालय परिसरमा आधा दर्जन ब्राम्हण जग्गेमा बैद्धिक विधि पुरा गरिरहेका थिए । यि सबै काम विद्यालयमा हुन लागेको विवाह कार्यक्रमका लागि थियो । विद्यालय परिसरमा रहेको बर र पिपलको विवाहका लागि सबैलाई निम्तो गरिएको थियो । ब्राम्हणहरुले बरपिपलको बैद्धिक मन्त्रोचारण गरी विवाह सम्पन्न गरेपछि सबै सहभागिलाई भोजन र प्रसादी ग्रहण गराईएको थियो ।

विद्यालयमै यस्तो विवाह कार्यक्रम भएको आफुले पहिलो पटक देखेको राजदेवी माविका प्रधानाध्यापक सानुकाजी पाण्डेले प्रतिक्रिया दिए । यसलाई चौतारीको रुपमा विकास गर्ने सोच रहेको विद्यालय शिक्षक अभिभावक संघका पूर्व अध्यक्ष कालिबहादुर राईले बताए ।
विद्यालय व्यवस्थापन समितिमा सबै महिला
विद्यालयको व्यवस्थापन समितिमा सबै महिला नेतृत्व छानिएका छन् । मंगलबार भएको विशेष अभिभावक भेलाले धनकुमारी राई, लक्ष्मी राई, मनमाया राई र सुन्तली राईलाई व्यवस्थापन समितिको सदस्यमा चयन गरेको हो ।

जनप्रिय उच्च मावि श्रोतकेन्द्रका श्रोत व्यक्ति केशवप्रसाद सञ्जेलको प्रमुख आतिथ्यता एवं विद्यालयका अध्यक्ष बीरबहादुर राईको अध्यक्षतामा विशेष अभिभावक भेला भएको हो । भेलामा त्रिभुवन माविका प्रधानाध्यापक शालिकराम घिमिरे, विद्यालयका प्रधानाध्यापक बासुदेव सापकोटा, शिक्षक अभिभावक संघका पूर्व अध्यक्ष कालिबहादुर राई, पूर्व विद्यार्थी अयोध्याकुमार भट्टराई लगायतले मन्तव्य व्यक्त गरेका थिए ।