लोकतान्त्रिक अधिकार संकुचित बनाउँदै सरकारः देउवा

१० कार्तिक, हेटौंडा । प्रमुख प्रतिपक्ष दल नेपाली काँग्रेसका सभापति शेरबहादुर देउवाले कम्युनिष्ट नेतृत्वको वर्तमान सरकारले लोकतान्त्रिक हक अधिकारलाई संकुचित बनाउन खोजिरहेको आरोप लगाएका छन् ।
नेपाल तरुण दलले आईतबार पार्टी केन्द्रिय कार्यालय, सानेपामा आयोजना गरेको एक कार्यक्रममा बोल्दै उनले यस्तो बताएका हुन् ।
पूर्व प्रधानमन्त्री समेत रहेका सभापति देउवाले अभिव्यक्ति स्वतन्त्रतालाई समेत सरकारले संकुचित गर्ने प्रयास गरिरहेको उल्लेख गर्दै त्यस्ता षडयन्त्रलाई निष्तेज पार्ने गरी तयारी अवस्थामा रहन पनि पार्टीका तरुण तथा विद्यार्थीहरुलाई निर्देशन दिए ।
उनले संघीय लोकतान्त्रिक गणतन्त्रको रक्षा गर्न, नेपाली जनताको बोल्न, लेख्न, संगठन खोल्न पाउने लगायतका प्रजातान्त्रिक अधिकारहरुको रक्षा गर्ने दायित्व पार्टीका तरुण र युवाहरुको काँधमा आएको उल्लेख गर्दै सोही अनुसारको जिम्मेवारी पूरा गर्न सक्ने गरी संगठनलाई सशक्त बनाउन आग्रह गरे । 
सभापति देउवाले ६६ वर्ष अघि तरुण दल स्थापनाकै दिन पारेर राजा महेन्द्रले पहिलो जननिर्वाचित सरकारका प्रधानमन्त्री विपी कोइरालालाई जेल चलान गरेर मुलुकमा फेरी निरंकुशता लादेको पनि स्मरण गराएका थिए ।