प्रदेश प्रमुख प्रसाईबाट पदभार ग्रहण, मूख्यमन्त्री अनुपस्थित

२० कार्तिक, हेटौँडा । ३ नम्बर प्रदेशका नवनियुक्त प्रदेश प्रमुख विष्णुप्रसाद प्रसाईले बुधबार पदभार ग्रहण गरेका छन् ।
मंगलबार राष्ट्रपति विद्यादेवी भण्डारीबाट प्रदेश प्रमुखको सपथग्रहण गर्नुभएका प्रसाईले बुधबार दिउँसो प्रदेश प्रमुखको कार्यालय हेटौँडामा पदभार ग्रहण गरेका छन् । उनलाई प्रदेशका मन्त्री शालिकराम जम्कट्टेल, कैलाश ढुंगेल, युवराज दुलाल, प्रदेश सांसद प्रदिपकुमार कटुवाल क्षेत्री, जिल्ला समन्वय समितिका प्रमख रघुनाथ खुलाल, हेटौँडा नगरपालिकाकी उपप्रमुख मिना लामा, सरकारी कर्मचारी र सुरक्षा निकायका प्रतिनिधिहरुले स्वागत गरेका थिए । पदभार ग्रहण गर्दै उनले सबैसंगको सहकार्यमा संवैधानिक दायरामा रही प्रदेशको प्रगति र उन्नतिमा काम गर्ने बताए ।
पदभार ग्रहणपछि प्रदेश प्रमुख प्रसाईले मन्त्री, प्रदेश सांसद, सरकारी कर्मचारी र सुरक्षा निकायका प्रतिनिधिहरुलाई सम्बोधन गरेका थिए । कार्यक्रममा ३ नम्बर प्रदेशका मूख्यमन्त्री डोरमणी पौडेल भने अनुपस्थित रहेका थिए । प्रदेश प्रमुख प्रसाई सपथग्रहणका लागि हेटौँडा आउँदा मूख्यमन्त्री पौडेल भने काठमाडौं लागेका थिए । मूख्यमन्त्री पौडेल कामको सिलसिलामा केही दिनका लागि काठमाडौं गएको उनका प्रेस संयोजक प्रकाश दाहालले जानकारी दिए । मूख्यमन्त्री पौडेल पाँच दिन काठमाडौंमा रहनेछन् ।