प्रदेश राजधानी टुंग्याउन नसकेर हैन सहमति कुरेर ढिलो भयो : श्रेष्ठ

३० कार्तिक, काठमाडौं । ३ नम्बर प्रदेशका  सभामुख सानुकुमार श्रेष्ठले नसकेर नभई सहमति कुरेर बस्दा स्थायी राजधानी र नाम टुग्याउन नसकिएको बताएका छन् ।
फ्रिडम फोरमले काठमाडौंमा गरेको ‘खुला संसद : अवधारणा र अभ्यास’ विषयक अन्तरक्रिया कार्यक्रममा बोल्दै सभामुख श्रेष्ठले उनले आफु स्थायी राजधानी र नाम टुंगो लगाउन सक्षम रहेपनि सहमति कुर्दा ढिलो भएको बताए । ‘संसदमा दर्ता भएका ४५ वटा विधेयक पारित गरेर शुन्यमा पुर्याउन सक्नेले राजधानीको प्रक्रिया अघि बढाउन नसक्ने हो र ?’–उनले भने–‘सहमति कुर्दा ढिलो भयो ।’ 
उनले राजधानी र नाम जस्तो विषय सहमतिमै टुंग्याउँदा राम्रो हुने मनसायले कुरेर बसेको भन्दै अब भने नैतिक प्रश्न उठ्न थालेको बताए । उनले आगामी अधिवेशनमा प्रक्रिया अघि बढ्न सक्ने बताए । उनले अन्य प्रदेशको तुलनामा ३ नम्बर प्रदेशसभाको काम कारवाही चुस्त र व्यवस्थित रहेको भन्दै सुधार गर्नुपर्ने विषयमा थप सुधारको लागि तयार रहेको बताए । 
कार्यक्रममा सहभागी प्रदेशसभा सदस्य, नागरिक समाज र संचारकर्मीहरुले प्रदेश सरकारले आप्mनो काम कारवाहीलाई पारदर्शी बनाउन काम गर्नुपर्ने, प्रदेशसभा र समितिमा विधेयकमाथि हुने छलफललाई प्रभावकारी बनाउनुपर्ने, प्रविधिको प्रयोग गरी संसदलाई नागरिकको पहुँचमा पुर्याउनुपर्ने लगायतका सुझाव दिएका थिए । कार्यक्रममा पूर्व मूख्य सचिव सोमनाथ सुवेदी, प्रदेश मामिला समितिका सभापति माधवप्रसाद पौडेल, सार्वजनिक लेखा समितिका सभापति न्हुक्षेनारायण श्रेष्ठ, फ्रिडम फोरमका कार्यकारी प्रमुख तारानाथ दाहाल लगायतको उपस्थिति रहेको थियो । 
कार्यक्रममा खुला संसद र खुला सरकारबारे अवधारणा प्रस्तुत गरिएको थियो । फ्रिडम फोरमका अध्यक्ष हरिविनोद अधिकारीको सभाध्यक्षतामा भएको कार्यक्रम भएको थियो ।