प्रदेश ३ मा सक्षम जनशक्ति नियुक्त हुन्छ : श्रेष्ठ

२ मंसिर, हेटौँडा । ३ नम्बर प्रदेशका नवनियुक्त प्रदेश लोकसेवा आयोगका अध्यक्ष सुरेशमान श्रेष्ठले सपथग्रहण गरेका छन् । कार्तिक २९ गते आयोग अध्यक्षमा नियुक्त भएका श्रेष्ठले सोमबार पद तथा गोपनीयताको सपथग्रहण गरेका हुन् ।
उनलाई प्रदेश प्रमुखको कार्यालय हेटौँडामा ३ नम्बर प्रदेशका प्रदेश प्रमुख विष्णुप्रसाद प्रसाईले सपथ गराएका थिए । सपथग्रहणपछि नवनियुक्त अध्यक्ष श्रेष्ठले ३ नम्बर प्रदेशमा निष्पक्ष ढंगले कर्मचारी व्यवस्थाको काम गर्ने बताए । दल वा निकटताका आधारमा कसैलाई पनि विभेद नहुने उनको प्रतिवद्धता थियो । प्रदेश नम्बर ३ मा सक्षम जनशक्ति नियुक्त हुने दावि समेत गरे । उनले रिक्त सदस्य पदमा पनि नियुक्तिका लागि पहल गर्ने बताए ।
कार्यक्रममा ३ नम्बर प्रदेशका मूख्यमन्त्री डोरमणी पौडेल, सभामुख सानुकुमार श्रेष्ठ, जनप्रतिनिधि, सुरक्षा निकायका प्रतिनिधि लगायतको सहभागिता रहेको थियो । सरकारका पूर्वसचिव श्रेष्ठलाई मुख्यमन्त्री डोरमणी पौडेल संयोजक र सभामुख सानुकुमार श्रेष्ठ र प्रमुख विपक्षी दलका नेता इन्द्रबहादुर बानियाँ रहेको समितिले आयोगको अध्यक्षमा सिफारिस गरेको थियो । समितिले सिफारिसपछि प्रदेश प्रमुखले उनलाई अध्यक्षमा नियुक्त गरेका थिए । आयोगको अध्यक्ष नियुक्त भएपनि दुई सदस्यको नियुक्ति भने बाँकी छ ।