तरुण दलद्वारा भ्रष्टाचारविरुद्ध हेटौँडा–१९ मा ज्ञापनपत्र

८ मंसिर, हेटौँडा । नेपाल तरुण दलको भ्रष्टाचारविरुद्ध अभियान अन्तरगत हेटौँडा–१९ वडा कार्यालयमा ज्ञापनपत्र बुझाएको छ । तरुण दल १९ नम्बर वडा इकाईले आइतबार वडा कार्यालयमा ज्ञापनपत्र बुझाएको हो । 
तरुण इकाई अध्यक्ष सुसन रिमाल नेतृत्वको टोलीले वडा सदस्य इन्दिरा लामालाई ७ बुँदे ज्ञापनपत्र बुझाएको छ । ज्ञापनपत्रमा वडा कार्यालयबाट पछिल्लो ३ बर्षमा विनियोजित बजेट विवरण, खर्च र फछ्र्यौट हुन बाँकी योजनाबारे जानकारी माग गरिएको छ । त्यस्तै, घरबाटो सिफारिस दिंदा झुटो व्यहोरा दिएर राज्यलाई आउने राजस्व छलिमा सहयोग गरेको, आलेचौर भालेखोला खानेपानी योजना सम्पनन नभएपनि खर्च फछ्र्यौट गरिएको र घटनामा संकलनलाई कारवाही किन नगरेको, विकास निर्माण कार्यमा मेसिन औजार चलाउन आफु अनुकुल योजना किन परिवर्तन गरियो, सार्वजनिक खरिद बमोजिम सामान खरिद नगरिएको लगायतका जानकारी माग गरिएको छ ।
ज्ञापनपत्रमा स्थानीय उद्योगधन्दाको वातावरणीय प्रभाव, समस्या र स्थानीयबासीलाई हुने अवसरबारे युवाहरुद्वारा बुझाएको ज्ञापनपत्रमा भएको छलफल र विकास निर्माणको नाममा नियम विपरित मेसिन औजार प्रयोग गरेर वन विनास गर्नुको कारण र फडानीका क्रममा प्राप्त काठ दाउराको अवस्थाबारे जानकारी माग गरिएको छ ।
आफुहरुले ७ दिनको अल्टिमेटमसहित ज्ञापनपत्र बुझाएको र जनताको सूचना पाउने अधिकार अनुसार पनि वडालाई जानकारी उपलव्ध गराउन माग गरेको तरुण दल १९ नम्बर वडा अध्यक्ष रिमालले बताए । माग पुरा नभए तरुण दलले चरणबद्ध आन्दोलन गर्ने चेतावनी समेत दिईएको छ ।