रेडक्रस मनहरीको सभापतिमा नुरोज

१५ फागुन, हेटौँडा । नेपाल रेडक्रस सोसाइटी मनहरी उपशाखाको सभापतिमा नुरोज पौडेल विजयी भएका छन् । मनहरीमा आइतबार भएको पाँचौ अधिवेशनले पौडेलको नेतृत्वमा ९ सदस्यीय नयाँ कार्यसमिति निर्वाचित गरेको हो । पौडेलले अध्यक्षका प्रतिद्वन्द्वी भुवन जोशीलाई हराएका हुन् ।

पौडेलले २ सय ६६ मत प्राप्त गर्दा जोशीले १ सय ८६ मत मात्र प्राप्त गरेका थिए । यस्तै सदस्यमा शिवशंकर स्याङ्तान (२३८), मोहन थापा (२३८), सुमन कार्की (२५८), नरहरी सुवेदी (२२९), स्वतन्त्र उप्रेती (२११), गौतम लामा (२१०), प्रकाश सामरी (२१०) र शिवमान कार्की (२०९) विजयी भएका छन् । चुनावमा नेकपा एमाले र माओवादी केन्द्रको एउटा प्यानल बनेको थियो भने नेपाली काँग्रेस र राप्रपाको एउटा प्यानल बनेको थियो ।

चुनावमा काँग्रेस र राप्रपाको प्यानल विजयी भएको हो । नेपाल रेडक्रस सोसाइटी जिल्ला शाखा मकवानपुरका सभापति सूर्यचन्द्र न्यौपानेको प्रमुख आतिथ्यता तथा उपशाखा सभापति मोहन कार्कीको अध्यक्षतामा भएको कार्यक्रममा मन्त्री लालबहादुर थापा, जिल्ला सदस्य पिताम्बर बास्तोला, निवर्तमान उपशाखा सभापति गोविन्द रिजाल, सानाकिसान सहकारीको तर्फबाट एकराज उप्रेतीलगायतले मन्तव्य व्यक्त गरेका थिए ।

४ बर्षीय कार्यकालको लागि सभापतिमा निर्वाचित भएका पौडेलले सामाजिक सेवामा निरन्तर लागिपर्ने हौसला बढेको प्रतिक्रिया दिए ।