कोरोनाबाट मर्नेको संख्या ९ सय ४ पुग्यो 

२७ माघ, हेटौंडा । विश्वभर त्रास फैलाएको ‘कोरोनाभाइरस’का कारण मर्नेको संख्या ९ सय ४ पुगेको छ ।
ज्यान गुमाउनेमध्ये ९ सय २ जनाको चीनमा, एक जनाको फिलिपिन्समा र एक जनाको हङकङमा ज्यान गएको बीबीसीले जनाएको छ । 
यस्तै २९ हजार ६ सय ३१ जनामा कोरोना संक्रमण भएको पुष्टी भएको समाचारमा उल्लेख गरिएको छ । पछिल्लो २४ घण्टामा मात्र २ हजार ६ सय १८ जनामा संक्रमण पुष्टी भएको हो । 
यसैविच चीनमा देखा परेको कोरोना भाइरसको महामारी विश्वका विभिन्न २५ मुलुकमा फैलिएको विश्व स्वास्थ्य संगठन डब्ल्यु.एच.ओले जनाएको छ ।
चीनको हुवानबाट जनवरी २९ मा युएई फर्केका एक परिवारका चार सदश्य र अन्य ३ जनामा कोरोनाको संक्रमण पुष्टि भएको बिश्व स्वास्थ्य संगठनको प्रतिवेदनमा उल्लेख छ । 
यस्तै फ्रान्समा सिंगापुरबाट फर्केका बेलायती नागरिक र चीनबाट फर्केका सहित ११ जनामा यो भाइरस पुष्टि भएको छ । 
डब्ल्यु.एच.ओ.का अनुसार, जापानमा ८९, थाइल्याण्डमा ३२, क्यानाडामा ७ , जर्मनीमा १३, कोरियामा २ , मलेसियामा १७, अष्ट्रेलियामा १५, भियतनाममा १३ , सिंगापुरमा ३३, ताइवानमा १७ जनामा कोरोना भाईरस पुष्टि भएको छ । 
यस्तै बेलायत र रुसमा २, इटलीमा तीन, फिलिपिन्स र भारतमा तीन, बेल्जियममा ९, स्पेन, स्वीडेन, फिनल्याण्ड, श्रीलंका, नेपाल, कम्बोडियामा १ जनामा कोरानाको संक्रमण पुष्टि भएको विश्व स्वास्थ्य संगठनको प्रतिवेदनमा उल्लेख छ ।