सभापति देउवाको कदमले पार्टीलाई कमजोर बनायोः बरिष्ठ नेता पौडेल

१८ फागुन, हेटौंडा । नेपाली कांग्रेस बरिष्ठ नेता रामचन्द्र पौडेलले पार्टी सभापति शेरबहादुर देउवाले पार्टीको बिधान विपरित काम गरेर पार्टीलाई कमजोर बनाएको अरोप लगाएका छन् ।
उनले पार्टी सभापति देउवाले निर्वाचन आचारसंहिता विपरित १४ औं महाधिवेशन नजिकिँदै गर्दा पद र पैसा बाँडेर पार्टीलाई कमजोर बनाउन खोजेको आरोप लगाएका हुन् ।
नेपाल प्रेस युनियन मकवानपुरले आयोजना गरेको पत्रकार सम्मेलनमा बोल्दै बरिष्ठ नेता पौडेलले महाधिवेशनको मुखमा विभाग गठन गरेर आफ्नो व्यक्तिगत प्रभाव बढाउन खोजेको बताए । उनले सभापति देउवाले गठन गरेको विभागमा विधान विपरित भएकोले
 मान्न नसक्ने समेत बताए ।
यसैगरी पौडेलले पार्टी नेतृत्वकै कारण कांग्रेस प्रतिपक्षमा कमजोर भूमिकामा रहेको आरोप लगाए । सभापति देउवाकै कारण सरकारको कमजोरीको विरोध गर्न कांग्रेसपछि परेको पौडेलको भनाइ छ ।
उनले कम्युनिष्ट सरकार भ्रष्टाचार, अनियमिततामा लिप्त हुँदा समेत प्रतिपक्षले संसदमा खुलेर विरोध गर्न नसकेको बताए ।
बरिष्ठ नेता पौडेलले बर्तमान कम्युनिष्ट सरकार र यसका मन्त्रीहरु नीतिगत र संस्थागत भ्रष्टाचारमा लिप्त रहेको आरोप लगाउँदै यो सरकारले जनताको पक्षमा केही गर्न नसक्ने ठोकुवा गरे ।
पत्रकार सम्मेलनमा कांग्रेस महामन्त्री शशांक कोइरालाले आफु निर्वाचित भएपछि सभापतिले विभाग गर्न आनाकानी गरेको तर महाधिवेशन नजिकिँदैै गर्दा विभाग गठन गरेर व्यक्तिलाई आकर्षित गर्न खोजिएको आरोप लगाए । उनले आफुखुशी विभाग बढाएर २८ बाट ४८ पु¥याएको दावी समेत गरे ।
महामन्त्री कोइरालाले देउवाले गरेको कुनैपनि गतिविधिमा आफ्नो सहमति नरहेको दाबी गर्दै पार्टीलाई नोक्सान हुने कार्यमा मात्र सभापतिले ध्यान दिएको आरोप लगाए ।
नेपाल प्रेस युनियनका मकवानपुरका अध्यक्ष कुमार अधिकारीको अध्यक्षतामा भएको पत्रकार सम्मेलनमा केन्द्रीय सदस्य प्रकाशमान सिंह, डा.रामशरण महत, केन्द्रीय सदस्य बलबहादुर केसी लगाएतको उपस्थिति रहेको थियो ।