पुर्व सञ्चारमन्त्रीमाथी छानविन नहुनुमा सरकारको नियत खराबः देउवा

१८ फागुन, हेटौंडा । प्रमुख प्रतिपक्षी दलका सभापति शेरबहादुर देउवाले सेक्युरिटी प्रिन्टिङ प्रेस प्रकरणमा पूर्व सञ्चारमन्त्रीले राजीनामा दिएको एक हप्ता वितिसक्दा समेत किन छानबिन सुरु नभएको भनि सरकारसँग प्रश्न गरेका छन् ।
प्रतिनिधिसभा बैठकमा समय लिएर बोल्दै सभापति देउवाले पूर्व सञ्चार तथा सूचना प्रविधिमन्त्री गोकुल बास्कोटा माथि छानबिन सुरु नहुनु गम्भिर विषय भएको बताए ।
छानबिन सुरु नहुँदै प्रधानमन्त्रीले अडियो नक्कली हो भन्दै अभिव्यक्ति दिएपछि छानबिन प्रभावित गर्ने गम्भिर नियत भएको आरोप समेत लगाए ।
सभापति देउवाले छानबिन गर्ने निकायले छानबिन गर्नुभन्दा पहिले नै प्रधानमन्त्रीले अडियो नक्कली भएको स्पष्टिकरण दिदै हिड्नुले सरकारको नियत स्पष्ट भएको बताए ।
सभापति देउवाले सेक्युरिटी प्रिन्टिङ प्रेस प्रकरणको अनियमितताबाट ध्यान अन्त मोड्न सरकारले नेपाल ट्रष्टको स्वेतपत्र लिएको आरोप समेत लगाए ।
उनले नेपाल ट्रष्टको स्वेतपत्रमा उल्लेख भएजस्तो आफु प्रधानमन्त्री भएको समयमा कुनै निर्णय नभएको प्रष्टिकरण दिर्दै राजनीतिक पूर्वाग्रहका कारण आफ्नो नाम जोडिएको दावी गरे ।
बैठकमा प्रधानमन्त्री केपी शर्मा ओली भने अनुपस्थित रहेका थिए । संसदीय मान्यता अनुसार प्रधानमन्त्री बोल्दा विपक्षी दलको नेता र विपक्षी दलको नेता बोल्दा प्रधानमन्त्री उपस्थित हुने परम्परा भएपनि प्रधानमन्त्री भने आजको बैठकमा अनुपस्थित भए ।