मकवानपुरका १० कार्यालयसँग सूचना मागिदैं

१० साउन, हेटौँडा । मकवानपुरका १० सरकारी कार्यालयसँग सार्वजनिक चासोका सूचना माग गरिने भएको छ । सूचनाको हक कार्यान्वयनका लागि सचेतना अभिबृद्धि गर्ने उद्देश्यले एक समूहले सरकारी कार्यालयसँग आव २०७२/०७३ मा भएको खर्चको सूचना माग्न लागेको हो । 
पत्रकार, व्यवसायी, पेशाकर्मी, वकिलसहितको समूहले पहिलो चरणमा सोमबार अख्तियार दुरुपयोग अनुसन्धान आयोग क्षेत्रीय कार्यालय हेटौँडा, जिल्ला विकास समिति मकवानपुर, जिल्ला प्रशासन कार्यालय मकवानपुर, आन्तरिक राजस्व कार्यालय मकवानपुर र जिल्ला वन कार्यालय मकवानपुरमा निवेदन दिएको छ । निवेदनमा गत आवमा इन्धनको खर्च, लगबुक र अतिथि सत्कार शिर्षकमा भएको खर्चको विल भरपाईसहितको प्रमाणित प्रतिलिपि माग गरिएको । 
समूहले सोमबार निवेदन दर्ता गर्न नभ्याएका ५ कार्यालयमा पनि सूचना हकसम्बन्धी ऐन २०६४ अनुसार निवेदन दर्ता गर्ने सूचनाको हकका लागि नागरिक अभियानका संयोजक कुमार अधिकारीले बताए । जनताको सूसुचित हुने अधिकारी सुनिश्चितता र सार्वजनिक निकायलाई जवाफदेही बनाउन अभियान संचालन गरेको उनको भनाई छ । सोमबार सूचनाको हक कार्यान्वयनबारे भएको अन्तरक्रिया पछि यसको शुरुवात भएको हो । यसबारे नियमित समिक्षा गरिने अभियान रहेको जनाईएको छ ।