कोरोनाको संक्रमणबाट १४ हजार ६१६ जनाको मृत्यु  

१० चैत्र, हेटौंडा । विश्वमा महारामारीको रुपमा फैलिरहेको कोभिड–१९ का कारण १४ हजार ६१६ जनाको मृत्यु भएको छ ।
३ लाख २६ हजार ८३८ जनामा भाइरस संक्रमणको पुष्टि भइसकेको छ । ९७ हजार ६३६ जना उपचारपछि घर फर्किएका छन् । 
कोरोना भाइरस संक्रमण चीनबाट सन् २०१९ को डिसेम्बरमा शुरू भएपनि अहिले युरोप यसको केन्द्रबिन्दु बनेको छ ।
पछिल्लो समय सबैभन्दा धेरै मानिसको मृत्यु इटलीमा गएको छ । पछिल्लो २४ घण्टामा थप ६ सय ५१ जनाको मृत्यु भएपछि त्यहाँ कोरोनाका कारण मृत्यु हुनेको संख्या ५ हजार ४ सय ७६ पुगेको छ ।
मध्यपूर्वका राष्ट्रहरुमध्ये इरानमा कोरोना भाइरसको संक्रमण सबैभन्दा डरलाग्दो अवस्थामा छ । यहाँ कोरोनाकै कारण १ हजार ६ सय ८५ जनाको ज्यान गएको छ भने २१ हजार ६ सय ३८ जना संक्रमित छन् ।
यस्तै युरोपियन राष्ट्रहरुमा स्पेनमा पनि कोरोना संक्रमणका कारण मर्नेको संख्या थपिदै गएको छ । स्पेनमा हालसम्म कोरोना भाइरसको संक्रमणबाट मृत्यु हुनेको संख्या कारण १ हजार ७ सय ५६ पुगेको छ । पछिल्लो २४ घण्टामा स्पेनमा ३७५ जनाले ज्यान गुमाएका छन् ।
कोरोनाको संक्रमणबाट अमेरीका, जर्मनी, फ्रान्स, दक्षिण कोरिया, बेलायतm स्विटजरल्याण्ड जस्ता मुलुकहरु बढी प्रभावित भएका छन् । 
कोरोना भाइरसको उद्गम स्थल चीनमा भने कोरोना भाइरसका नयाँ संक्रमण देखिन छाडेको छ  । चीनमा ८१ हजार ५४ जनामा संक्रमण भएकोमा ३ हजार २६१ जनाको ज्यान गएको छ भने ७२ हजार ४४० जना उपचारपछि घर पर्किएका छन् । यसैगरी ५ हजार ३५३ जनाको उपचार चलिरहेको छ ।
यता दक्षिण एसियाली मुलुकहरु भारतमा कोरोनाको संक्रमणबाट ७ जनाको मृत्यु भएको छ भने संक्रमितको संख्या बढेर ३ सय ९६ जना पुगेको छ । यसैगरी श्रीलङ्कामा, अफगानिस्तानमा, बङ्गलादेशमा, माल्दिभ्समा र भुटानमा पनि संक्रमित देखिएका छन् ।
नेपालमा भने हालसम्म एक व्यक्तिमा कोरोना संक्रमणको आशंका गरिए पनि उनी उपचारपछि घर फर्किसकेका छन्  र नयाँ संक्रमित व्यक्ति भेटिएका छैनन् ।