कोरोना कहरः १६ हजार ५०९ जनाको मृत्यु

११ चैत्र, हेटौंडा । विश्वभर महारामारीको रुपमा फैलिरहेको कोभिड–१९ का कारण विश्वका १९० राष्ट्र प्रभावित भएका छन् ।
भाइरसको संक्रमणका कारण विश्वभर १६ हजार ५०९ जनाको मृत्यु भएको छ । ३ लाख ७८ हजार ८२९ जनामा भाइरस संक्रमणको पुष्टि भइसकेको छ । 
१ लाख २ हजार ६४ जना उपचारपछि घर फर्किएका छन् । कोरोना भाइरस संक्रमण चीनबाट सन् २०१९ को डिसेम्बरमा सुरू भएपनि अहिले युरोप यसको केन्द्रविन्दु बनेको छ । 
सबैभन्दा धेरै मानिसको मृत्यु इटलीमा भएको छ । इटालीमा कोरोनाका कारण मृत्यु हुनेको संख्या ६ हजार ७७ जना पुगेको छ । पछिल्लो २४ घण्टामा इटालीमा मात्रै ६०१ जनाको ज्यान गएको छ । यसैगरी स्पेनमा पनि मर्नेको संख्या तिब्रगतिमा बढिरहेको तथ्याङकले देखाएको छ । 
पछिल्लो २४ घण्टामा स्पेनमा ५३९ जनाको मृत्यु भएसँगै यहाँ मर्नेको संख्या २ हजार ३११ पुगेको छ । यस्तै मध्यपूर्वका राष्ट्रहरुमध्ये इरानमा कोरोना भाइरसको संक्रमण सबैभन्दा डरलाग्दो अवस्थामा छ । त्यहाँ कोरोनाकै कारण १ हजार ८१२ जनाको मृत्यु भएको छ भने  २३ हजार ४९ जना संक्रमित छन् । 
यसैगरी जर्मनी, अमेरिका, फ्रान्स, दक्षिण कोरिया लगाएतका देशमा पनि मर्ने र संक्रमित हुनेको संख्या दिनानुदिन बढीरहेको छ ।