मेयरमा बल र उपमेयरमा पौडेल सिफारिस

१८ चैत, हेटौँडा । नेकपा माओवादी केन्द्रले बैशाख ३१ गते हुने स्थानीय तहको निर्वाचनका लागि हेटौंडा उपमहानगरपालिकाको मेयर र उपमेयरको उम्मेदवार सिफारिस गरेको छ । पार्टी जिल्ला सचिवालय बैठकले मेयरमा बलराम बल र उपमेयरमा कमला पौडेललाई सिफारिस गरेको छ । 
सिफारिस गरेका उम्मेदवारबारे प्रदेश कमिटिले टुंगो लगाउने जिल्ला संयोजक प्रेमबहादुर पुलामीले बताए । मेयरमा सिफारिस भएका हेटौँडा–१ निवासी बल केन्द्रका केन्द्रीय सदस्य, जिल्ला कार्यालय सदस्य र उपमहानगरपालिका ईन्चार्ज हुन् । सुकुम्बासी समस्या समाधान आयोग मकवानपुरका अध्यक्ष समेत भईसकेका बल मकवानपुरमा परिचित अनुहार हुन् ।
उपमेयरमा सिफारिस भएकी पौडेल केन्द्रकी केन्द्रीय सल्लाहकार र भातृसंगठन क्रान्तिकारी महिला संघकी जिल्ला अध्यक्ष हुन् । हेटौँडा–९ निवासी पौडेल पार्टीभित्र सक्रिय महिलाको रुपमा चिनिन्छिन् । 
माओवादी केन्द्रले एक दुई दिनमा थाहा नगरपालिका र ८ वटा गाउँपालिकाका उम्मेदवार समेत टुंगो लगाउने जिल्ला संयोजक पुलामीले बताए । सचिवालय बैठकले ३ हजार ९ सय ९९ सदस्यीय निर्वाचन प्रचारप्रसार समिति गठन गर्नुका साथै निर्वाचनमा सहयोग पु¥याउन एक बुथ तीन सय वाईसिएल परिचालन गर्ने निर्णय गरेको छ ।