कांग्रेसद्वारा हेटौंडाका ३ वडामा विपन्नलाई खाद्य सामग्री वितरण

१६ चैत, हेटौंडा । नेपाली कांग्रेस हेटौंडा उपमहानगर कार्यसमितिको संयोजनमा हेटौंडा उपमहानगरपालिकाका ३ वटा वडामा खाद्य सामग्री वितरण गरेको छ । नगर कार्यसमितिले लकडाउनको समयमा आर्थिक अवस्था कमजोर रही दुईछाक टार्न समस्या परेका परिवारलाई खाद्य सामग्री वितरण गरेको हो । 
आइतबार कांग्रेसले हेटौंडाको वडा नम्बर १, ४ र ६ नम्बर वडामा खाद्य सामग्री वितरण गरेको हो । दैनिक आवश्यक पर्ने १० किलो चामलसहित दाल, नुन, तेल, मसला, साबुन लगायतका सामग्री सहयोग गरेको नगर सभापति आनन्दराम पराजुलीले बताए । कांग्रेस मकवानपुरका सभापति एवं प्रदेश संसदीय दलका नेता इन्द्रबहादुर बानियाँ, जिल्ला सदस्य राजिव सुवेदी, ११ नम्बर वडा सभापति विष्णु खनालसहित नेताहरु उत्सव इटेनी, होमनाथ गौतम, तरुण दल नगर अध्यक्ष सुनिल गिरी, हेटौंडा १ नम्बर वडा अध्यक्ष सविन न्यौपाने, ५ नम्बर वडा अध्यक्ष राजेश बानियाँ, सञ्जिव सापकोटा, महिला संघ जिल्ला सदस्य जानकी गिरी र सुशिला गौतमले सामग्री सहयोग गरेका थिए । 
प्राप्त सामग्रीले स्थानीयको जीवनयापनलाई केही सहज बनाउने हेटौंडा ६ नम्बर वडा अध्यक्ष अर्जुनप्रसाद चौलागाईले बताए ।
आगामी दिनमा पनि दैनिक छाक टार्न समस्या परेका परिवारलाई जिल्ला प्रशासन कार्यालय मकवानपुरको अनुपमतिमा सामग्री वितरण गर्ने नगर सभापति पराजुलीले बताए ।