दक्षिण एसियामा कोरोनाः पाकिस्तानमा सबैभन्दा बढी संक्रमित

१९ चैत्र, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि आफनो प्रभाव देखाउँन थालेको छ ।
दक्षिण एसियाली देशहरुमा कोरोनाको संक्रमणबाट सबैभन्दा बढी भारतमा ३५ जनाको मृत्यु भएको छ । भारतमा संक्रमितको संख्या १ हजार ३९७ पुगेको छ । पछिल्लो २४ घण्टामा मात्रै यहाँ १४६ जना नयाँ संक्रमित थपिएका छन् । यस्तै भारतमा १२३ जना उपचारपछि स्वस्थ्य भएका छन् । 
भारतपछि कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म २६ जनाको ज्यान गएको छ । यहाँ संक्रमितको संख्या भने भारतमा भन्दापनि बढी छ । पछिल्लो २४ घण्टामा २२१ जना नयाँ संक्रमित थपिएसँगै पाकिस्तानमा संक्रमितको कुल संख्या १ हजार ९३८ पुगेको छ । 
यस्तै बंगलादेशमा कोरोना संक्रमणबाट ५ जनाको मृत्यु भएको छ भने ५१ जना संक्रमित भएका छन् । यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म २ जनाले ज्यान गुमाएका छन् भने १४३ जना संक्रमित छन् । 
कोरोना संक्रमणबाट माल्दिभ्समा अहिले सम्म कसैको पनि मृत्युभएको छैन । तर यहाँ अहिलेसम्म १८ जना संक्रमित भइसकेका छन् । 
यसैगरी नेपालमा कोरोना भाइरसको संक्रमणबाट ५ जना संक्रमित भएकामा एक जना उपचार पछि निको भएका छन् । 
भुटानमा पनि कारोना संक्रमण फैलिएको छ । यहाँ अहिले सम्म ४ जना संक्रमित भएका छन् । संक्रमितको संख्या बढेपछि भुटान सरकारले २१ दिनसम्म लकडाउनको घोषणा गरेको छ । फोटोः गुगल