होसियार !अब हेटौँडामा तरकारी किन्दा समयको ख्याल गर्नुपर्ने

१९चैत,हेटौंडा।आजबाट लकडाउन अवधिभर  दैनिक तरकारी किन्न हेटौंडा बजार जाने र नजिकैको तरकारी पसल जाने उपभोक्ताले तरकारी किन्दा समयको ख्याल गर्नु पर्ने भएको छ ‌।

मकवानपुर प्रशासनले बिहान बेलुका तरकारी बिक्री वितरण र किन्नमा रोक लगाएसंगै अब हेटौडाका उपभोक्ताले तरकारी किन्न बिहान १० बजेदेखि दिउँसो ३ बजे सम्ममात्र जाने पाउने भएका छन् । बिहान १० बजेदेखि दिउँसो ३ बजे सम्म मात्र तरकारी पसल खुल्ला हुने भएको छ। त्यसैगरी खाद्यान्न किन्नको लागि पनि प्रशासन कार्यालयले त्यही समय तोकेको छ। विहान र साँझ तरकारी किन्न निस्किएमा उपभोक्ता रित्तो हात फर्कनु पर्ने छ भने अटेर गरेमा प्रहरीले नियन्त्रणमा लिने छ।

प्रमुख जिल्ला अधिकारी दिपकराज नेपालको अध्यक्षतामा बसेको कमाण्ड पोष्टको बैठकले हेटौंडामा विहान र साँझ खुल्दै आएका खाद्यान्न, दुग्ध तथा तरकारी पसलहरु अब दिउँसो मात्रै खोल्ने व्यवस्था मिलाउन निर्देशन दिएको मकवानपुरका प्रहरी उपरीक्षक सुशिलसिंह राठौंरले जानकारी दिए ।

किनमेलको बहानामा बजारमा विहान र साँझपख भिडभाड हुन थालेपछि यस्तो व्यवस्था गरिएको छ ।अन्य समयमा ति पसल खोले कारवाही हुने भएको छ । दिउँसो किनमेल गर्न जाँदा समेत भिडभाड नगर्न आग्रह गरिएको छ।