मकवानपुरको मूख्य निर्वाचन अधिकृत र अधिकृतको टुंगो (नामसहित)

२२ चैत, हेटौँडा । निर्वाचन आयोगले मकवानपुरसहित देशभरका मूख्य निर्वाचन अधिकृत र निर्वाचन अधिकृतहरुको नामावली मंगलबार सार्वजनिक गरेको छ । 
कार्यालयले चैत २५ गतेदेखि लागु हुने गरी मकवानपुरमा एक मूख्य निर्वाचन अधिकृत र ९ निर्वाचन अधिकृत नियुक्त गरेको हो । नियुक्त भएका मूख्य निर्वाचन अधिकृत र अधिकृतहरुको नाम गोरखापत्रमा सार्वजनिक गरिएको छ ।
मकवानपुरको मूख्य निर्वाचन अधिकृतमा जिल्ला अदालत मकवानपुरका न्यायाधिश दयाराम ढकाल नियुक्त भएका छन् । उनलाई हेटौँडा उपमहानगरपालिकामा खटाईएको छ । थाहा नगरपालिकामा थाहा नगरपालिकाका कार्यकारी अधिकृत जीवनप्रसाद आचार्यलाई निर्वाचन अधिकृत तोकिएको छ ।
यसैगरी, बागमति गाउँपालिकामा सर्वोच्च अदालतका इजलास अधिकृत चन्द्रप्रकाश तिवारी, बकैया गाउँपालिकामा विशेष सरकारी वकिल कार्यालय काठमाडौंका उपन्यायाधिवक्ता रमेशकुमार सुवेदी, भीमफेदी गाउँपालिमा सरकारी वकिल कार्यालयका जिल्ला न्यायाधिवक्ता हरिप्रसाद भट्ट, मनहरी गाउँपालिकामा मालपोत कार्यालय चितवन खैरहनीका उपसचिव विदुरप्रसाद खनाल निर्वाचन अधिकृत नियुक्त भएका छन् ।
मकवानपुरगढी गाउँपालिकामा अख्तियार दुरुपयोग अनुसन्धान आयोग कार्यालय हेटौँडाका उपसचिव देवकुमार राई, राक्सिराङ गाउँपालिकामा उच्च सरकारी वकिल कार्यालयका उपन्यायाधिवक्ता खडानन्द गौतम, कैलाश गाउँपालिकामा मालपोत कार्यालय मकवानपुरका उपसचिव मुक्तिनारायण भण्डारी र ईन्द्रसरोबर गाउँपालिकाका सहायक प्रमुख जिल्ला अधिकारी हरिप्रसाद पन्तलाई नियुक्त गरेको छ ।
नियुक्त भएका मूख्य निर्वाचन अधिकृतले २०७४ बैशाख ३ गते र निर्वाचन अधिकृतले बैशाख १२ गते आफ्नो कार्यालय स्थापना गर्नुपर्ने आयोगले जनाएको छ ।