कोरोना कहरः अमेरिकाले स्पेनलाई उछिन्यो 

२८ चैत्र, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को संक्रमणको कारण अमेरिकामा मर्नेको संख्या १६ हजार नाघेको छ ।
पछिल्लो २४ घण्टामा १ हजार ९ सय थप मानिसको मृत्यु भएपछि अमेरिकामा कुल मर्नेको संख्या १६ हजार ६ सय ९१ पुगेको छ । 
यो सँगै अमेरिका कोरोना संक्रमितबाट मर्नेको संख्यामा इटाली पछि दोश्रो स्थानमा उक्लेको छ । यसअघि इटाली पछि अर्को युरोपेली देश स्पेनमा सबैभन्दा बढी मानिसको मृत्यु भएको थियो ।
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ४ लाख ६८ हजार ५ सय ६६ जना संक्रमित भएका छन् । पछिल्लो २४ घष्टामा मात्रै यहाँ ३३ हजार ५ सय ३६ जना नयाँ संक्रमित थपिएका छन् । यस्तै अमेरिकामा २५ हजार ९ सय २८ जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म १ लखा ६१ हजार ५ सय ४ जना संक्रमित भएका छन भने ७ हजार ६७ जनाको ज्यान गएको छ । 
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ १ हजार ७ सय जनाले ज्यान गुमाएका छन् भने अहिलेसम्म ५१ हजार २७ जना संक्रमित भएका छन् ।
यस्तै अमेरिकाको अन्य राज्यहरु मिचिगन, क्यालिफोर्निया, मासाचुसेट्स, पेन्सिलभानिया, फ्लोरिडा, इलिनोइस लगाएतमा दिनानुदिन संक्रमित र मृतकको संख्या बढीरहेको छ ।