दक्षिण एसियाः भारतमा कोरोनबाट मर्नेको संख्या २२७ पुग्यो

२८ चैत्र, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि महामारीको रुप लिएको छ ।
दक्षिण एसियाली देशहरुमा कोरोनाको संक्रमणबाट सबैभन्दा बढी भारतमा २ सय २७ जनाको मृत्यु भएको छ । पछिल्लो समय थप ४९ जनाको मृत्यु भएपछि भारतमा मर्नेको संख्या २ सय २७ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या ६ हजार ७ सय २५ पुगेको छ । पछल्लो २४ घण्टामा मात्रै यहाँ ८ सय ९ जना नयाँ संक्रमित थपिएका छन् । यस्तै भारतमा ६ सय ३५ जना उपचारपछि स्वस्थ्य भएका छन् । 
भारतपछि दक्षिण एसियामा कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म ६५ जनाको ज्यान गएको छ । यहाँ २४ घण्टामा ४ जनाको ज्यान गएको छ । यस्तै थप २ सय २६ जना नयाँ संक्रमित थपिएसँगै पाकिस्तानमा संक्रमितको कुल संख्या ४ हजार ४ सय ८९ पुगेको छ । 
यस्तै बंगलादेशमा कोरोना संक्रमणबाट २१ जनाको मृत्यु भएको छ भने ३ सय ३० जना संक्रमित भएका छन् । वितेको २४ घण्टामा यहाँ १ जनाको ज्यान गएको छ भने १ सय १२ जना नयाँ संक्रमित थपिएका छन् ।
यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म ७ जनाले ज्यान गुमाएका छन् भने १ सय ९० जना संक्रमित छन् । 
दक्षिण एसियाली मुलुक माल्दिभ्स, नेपाल र भुटानमा कोरोना संक्रमितको संख्या केही दिन यता निरन्तर स्थिर अवस्थामा छ । यी तीन मुलकमा गरी अहिलेसम्म एकजनाको पनि मृत्यु भएको छैन । 
कोरोना संक्रमणबाट माल्दिभ्समा अहिले सम्म १९ जना संक्रमित भइसकेका छन् । नेपालमा कोरोना संक्रमित ९ जना रहेकोमा एक जना उपचार पछि निको भएका छन् भने अहिले सम्म ५ जना संक्रमित भएका छन् भने दुईजना उपचारपछि निको भएका छन् ।
यस्तै भुटानमा अहिलेसम्म ५ जनामा कोरोना संक्रमण भएको छ । यहाँ दुईजना उपचारपछि निको भएका छन भने तीन जनाको उपचार चलिरहेको छ ।