कोरोना कहरः अमेरिकामा एकैदिन २ हजारको मृत्यु

२९ चैत्र, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को संक्रमणको कारण अमेरिकामा एकैदिन २ हजार बढीको मृत्यु भएको छ ।
यो संख्या एकैदन कोरोना संक्रमणबाट मृत्युभएकाको सबैभन्दा ठुलो संख्या हो । पछिल्लो २४ घण्टामा अमेरिकामा २ हजार ४३ जनाको मृत्यु भएको छ ।
यो सँगै अमेरिकामा कोरोना संक्रमणबाट मर्नेको कुल संख्या १८ हजार ७ सय २५ पुगेको छ । यो सँगै अमेरिका कोरोना संक्रमितबाट मर्नेको संख्यामा इटालीको नजिक पुगेको छ । इटालीमा अहिलेसम्म १८ हजार ८ सय ४९ पुगेको छ ।  
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ५ लाख २ हजार ३ सय १८ जना संक्रमित भएका छन् । पछिल्लो २४ घण्टामा मात्रै यहाँ ३३ हजार ७ सय ५२ जना नयाँ संक्रमित थपिएका छन् । यस्तै अमेरिकामा २७ हजार ३ सय १४ जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म १ लाख ७२ हजार ३ सय ५८ जना संक्रमित भएका छन भने ७ हजार ८ सय ४४ जनाको ज्यान गएको छ । 
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ १ हजार ९ सय ३२ जनाले ज्यान गुमाएका छन् भने अहिलेसम्म ५४ हजार ५ सय ८ड जना संक्रमित भएका छन् ।
यस्तै अमेरिकाको अन्य राज्यहरु मिचिगन, क्यालिफोर्निया, मासाचुसेट्स, पेन्सिलभानिया, फ्लोरिडा, इलिनोइस लगाएतमा दिनानुदिन संक्रमित र मृतकको संख्या बढीरहेको छ ।