कांग्रेस मनहरीद्वारा ९ वडाका अध्यक्ष उम्मेदवारको टुंगो

४ बैशाख, हेटौँडा । स्थानीय तहको निर्वाचनको लागि नेपाली काँग्रेस मनहरी गाउँपालिकाको अध्यक्ष र उपाध्यक्ष पदमा २/२ जनाको नाम सिफारिस भएको छ ।

सोमबार बसेको काँग्रेसको बैठकले गाउँपालिका अध्यक्षको लागि शङ्कर न्यौपाने र नवराज उप्रेतीको नाम क्षेत्रीय समितिमा सिफारिस गरेको हो । न्यौपाने काँग्रेसका पूर्व क्षेत्रीय कोषाध्यक्ष एवम् वर्तमान सल्लाहकार हुन् भने उप्रेती जिल्ला सदस्य हुन् । यस्तै उपाध्यक्ष पदका लागि जानकी लामा र कमला कार्कीको नाम सिफारिस भएको छ । लामा महाधिवेशन प्रतिनिधी हुन् भने तामाङ घेदुङ संघ केन्द्रीय सदस्य हुन् । यस्तै कार्की पनि महाधिवेशन प्रतिनिधी हुन् ।

गाउँपालिका अध्यक्ष र उपाध्यक्ष पदमा आकांक्षा देखाएका ४ जनाकै नाम काँग्रेस क्षेत्रीय समितिमा पठाइएको छ । क्षेत्रले निर्णय गर्न नसकेमा जिल्ला समितिमा नाम पठाइने र यही ७ गतेभित्रमा टुङ्गो लगाउने बताइएको छ । यस्तै नेपाली काँग्रेसले मनहरी गाउँपालिकाको ९ वटै वडाको वडा अध्यक्षको उम्मेदवारको समेत टुङ्गो लगाएको छ । वडा नम्बर १ मा शिव खनाल, २ मा प्रेम गोङ्बा, ३ मा सानुकाजी लुईंटेल, ४ मा मानबहादुर थिङ (फूलमान), ५ मा कृष्णबहादुर स्याङ्तान, ६ मा युवराज थपलिया (यादव), ७ मा ठाकुरसिं तितुङ, ८ मा मानबहादुर मोक्तान र ९ मा राजकुमार श्रेष्ठलाई वडा अध्यक्षको रुपमा अघि सारेको छ ।