हेटौंडाको क्विक ट्वान्टीका अधिकारी बाँदरको भोक मेट्दै

१३ बैशाख, हेटौंडा।विश्वव्यापी रुपमा फैलिएको कोरोना भाइरसको संक्रमणबाट जोगिन नेपाल सरकारले देशभर लकडाउन घोषण गरेको ३३ औँ दिन भईसकेको छ ।लकडाउनमा यतिबेला अधिकांश मानिस आफु कोरोना संक्रमणबाट जोगिन आफ्ना परिवारका साथ घरमा बस्दै आएका छन् । 

सबैलाई आफ्नो, परिवारको र आफन्तको मात्रै चिन्ता छ । सबै परिवार घरमै रहेर समय कटाउन चलचित्र हेर्ने, समाचारमा अपडेट रहने काम गरिरहेका छन् भने घरमा मिठा मिठा परिकार  बनाएको तस्विर सामाजिक हाल्नेहरु पनि बाक्लै भेटिन्छन् । घरबाहिर निस्कन नपाएपछि मठ मन्दिरमा पूजाआजा र भक्तजनको चहलपहल शुन्य प्रायः बनेको छ । तर अहिले केही जंगली जनावर भने समस्यामा परेका छन् । राजमार्ग आसपासका जंगल डढेलोले सखाप हुन थालेपछि ति जनावार खान नपाएर भौकै हुन थालेका छन् ।

यही कुरालाई मध्यनजर गरेर हेटौँडाका दुई जना व्यवसायीले बाँदरको भोक मेट्ने प्रयास गरेका छन् । हेटौँडा–४ हुप्राचौरमा रहेको क्विक टवान्टी पार्टी प्यालेसका दीपक अधिकारी र सरोज अधिकारीले खान नपाएर भोकै रहेका हेटौँडा–१५ रातोमाटेको जंगल र चुरे मन्दिर क्षेत्रका बाँदरलाई खानेकुरा खुवाएका हुन् । उनले पाउरोटी, भुजा लगायतका खानेकुरा खुवाएका छन्।‘राजमार्गमा गुडेका सवारीबाट खसेको र यात्रुले फालेका खानेकुरा खाने बाँदरहरु सवारी नचल्दा र जंगलमा लागेको डढेलोको कारण खाने कुरा नपाएर भोको देखेपछि यसरी खानेकुरा बाँडेको हुँ ।’–उनले भने ।

उनले सबै प्राणीको बाँच्न पाउने अधिकार भएकाले आफुले मानवीय भावनाले बाँदरहरुलाई खानेकुरा खुवाएको बताउँदै यसलाई सबैको सहयोगमा निरन्रता दिनु आवश्यक रहेको बताए । उनले त्यस क्षेत्रका मन्दिर व्यवस्थापन समिति र स्थानीय तहले बाँदहरुलाई खानेकुरा उपलव्ध गराउनु जरुरी रहेको बताए । अहिले खानेकुराको अभावमा कुकुरहरु भोकाउँदा आक्रोशमा मानिसलाई टोक्दै हिड्ने घटना समेत बढेको छ।मानवसंग आश्रित यस्ता जनावरलाई लक्षित गरेर ‘रेष्टुरेन्ट’ संचालन गर्नुपर्ने सर्वसाधारणको भनाई छ ।