मन्त्रीपरिषद बस्दै, लकडाउन एक हप्ता थप्ने सम्भावना

१४ बैशाख, काठमाडौं । सरकारले घोषणा गरेको लकडाउनको समयावधी सकिन एक दिन बाँकी रहँदा आइतबार मन्त्रीपरिषद बैठक बस्दैछ । लकडाउनबारे निर्णय गर्न मन्त्रीपरिषद बैठक बस्न लागेको हो । 
पटक पटक गर्दै लकडाउनको समय सरकारले बैशाख १५ गतेसम्मलाई बढाएको थियो । लकडाउनको समयावधी एक हप्ता थपिने सम्भावना रहेको एक मन्त्रीले बताए । ‘हतार गरेर लकडाउन खुलाउने निर्णय गर्दा ठूलो जोखिम व्यहोर्नुपर्ने हुन सक्छ ।’–उनले भने–‘यसका लागि एक कार्यदल बनेको छ, यसको सिफारिसका आधारमा लकडाउन र मोडलबारे मन्त्रीपरिषदले निर्णय गर्छ ।’ शनिबार भएको कोरोना रोकथाम तथा नियन्त्रण समन्वय समितिले लकडाउनबारे सिफारिस गर्न मुख्य सचिव लोकदर्शन रेग्मी नेतृत्वको कार्यदलको बनाएको थियो । कार्यदलले समेत लकडाउन एक हप्ता थप्न सिफारिस गरेको स्रोतहरुले दावि गरेका छन् । 
भारतमा कोरोना संक्रमितको संख्या बढिरहेको र मे ३ सम्म लकडाउन कायम रहेको अवस्थामा हतार गरेर नेपालले लकडाउन खुलाउँदा त्यहाँको जनसंख्याको चाप नेपालतर्फ आउने र जोखिम बढ्ने आवाज उठेको छ । कोरोना रोकथाम तथा नियन्त्रण समन्वय समितिले आन्तरिक तथा वाह्य हवाई उडानलाई जेठ २ गतेसम्म बन्द गर्ने निर्णय गरिसकेको छ ।