कारोनाबाट मर्नेको संख्या २ लाख नाघ्यो

१४ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मृतकको २ लाख नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया २ लाख ३ हजार २ सय ६९ पुगेको छ । पछिल्लो २४ घण्टामा संक्रमणबाट ६ हजार ६९ जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल २९ लाख २० हजार ९ सय १४ जना मासिन संक्रमित भएका छन् । पछिल्लो २४ घण्टामा मात्रै ९० हजार ७ सय ३१ जना नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ८ लाख ३६ हजार ७ सय ७ जना उपचारपछि निको भएका छन् ।
यस्तै भाइरसका संक्रमणका कारण अहिले ५७ हजार ८ सय ६४ जना गम्भीर अवस्थामा उपचार गराइरहेका छन् भने १८ लाख २३ हजार ७४ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । पछिल्लो २४ घण्टामा मात्रै अमेरिकामा २ हजार ६५ जनाको मृत्यु भएको छ । यो सँगै अमेरिकामा ज्यान गुमाउँनेको संख्या ५४ हजार २ सय ५६ पुगेको छ । 
अमेरिकापछि अहिलेसम्म इटलीमा सबैभन्दा बढीको कोरोना संक्रमणबाट ज्यान गएको छ । यहाँ २६ हजार ३ सय ८४ जनाको मृत्यु भएको छ । 
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २२ हजार ९ सय २ पुगेको छ । 
यसैगरी फ्रान्समा संक्रमणबाट मृत्यु हुनेको संख्या २२ हजार ६ सय १४ पुगेको छ भने बेलायतमा २० हजार ३ सय १९ जनाको मृत्यु भइसकेको छ । 
यसैगरी कोरोना भाइरसको संक्रमणबाट बेल्जियममा ६ हजार ९ सय १७, मध्यपूर्वी एसियाली मुलुक इरानमा ५ हजार ६ सय ५०, जर्मनीमा ५ हजार ८ सय ७७, नेदरल्याण्डसमा ४ हजार ४ सय ९, ब्राजिलमा ४ हजार ४५, टर्कीमा २ हजार ७ सय ६, स्विटजरल्याण्डमा १ हजार ५ सय ९९ जनाले ज्यान गुमाएका छन् ।
कोरोना भाइरसको उदगमस्थन चीनमा भने संक्रमणबाट ज्यान गुमाउनेको संख्या ४ हजार ६ सय ३२ रहेको छ । यहाँ नयाँ सक्रमित र मृतकको संख्या पछिल्लो समय स्थिर रहेको छ ।