अलपत्र परियो भन्दै ढाँटेर सहयोग माग्दै

१४ बैशाख, हेटौंडा । लकडाउनको समयमा अलपत्र परेकालाई उद्धार गर्न विभिन्न व्यक्ति र संघसंथा अहिले जुटिरहेका छन् । आफ्नो गन्तव्यमा जान भनेर हिडेका तर अलपत्र परेका र खान समस्या परेकाहरुलाई मकवानपुरका विभिन्न क्षेत्रमा सहयोग भईरहेको छ । 
तर अलपत्र परेको बहाना बनाउँदै सहयोग माग्ने क्रम पनि शुरु भएको खुलेको छ । हेटौंडा–५ क्याम्पाडाँडामा आइतबार विहानै आफु अलपत्र परेको गुनासो गरे सोलुखुम्बु घर बताउने प्रेम श्रेष्ठले । ३÷४ दिनदेखि खान समेत नपाएको भन्दै दुखेसो पोखेपछि मर्निङ वाकमा रहेका एक स्थानीयले क्याम्पाडाँडामा रहेका प्रहरी समेतको सहयोगमा सवारी साधनमा आवाजतजावत गर्नेहरुबाट स्वेच्छिक रकम संकलन गरे । संकलनका क्रममा १७ सय रुपैंया भयो । मानिसहरु अलपत्र परेको खबर पाएका वडा प्रहरी कार्यालयका प्रहरी निरीक्षक ईश्वरीप्रसाद भण्डारीले सहयोगी मन नेपाललाई फोन गरेर उद्धारका लागि आग्रह गरे । 
प्रष्टखबर टिम, सहयोगी मन, प्रहरीको सहयोगमा उनीहरुको उद्धार गरी भोजनका लागि प्रणामी समुदायले सेवा दिईरहेको हेटौंडा–१० तर्फ पठाईयो । तर उनीहरु यसअघि पनि त्यही स्थानमा खाना खाएर गएका रहेछन् । यसअघि प्रेम श्रेष्ठसहित श्रीमति उर्मिला, छोरा प्रकाश र पुष्पलाई घर जाने भनेपछि पटक पटक उद्धार गरी पठाएको प्रहरीले जानकारी दिएको छ । उनीहरु कहिले पूर्व जाने त कहिले पश्चिम जाने भन्दै गएपनि फर्किएर हेटौंडा आई यसैगरी सहयोग संकलन गर्ने गरेको प्रहरीको भनाई छ । 
सोलुखुम्बु जाने भनेर क्याम्पाडाँडाबाट उद्धार गरिएका उनीहरुले प्रहरीलाई आफुलाई नारायणगढ जाने सवारीमा चढाईदिन आग्रह गरेका थिए । आफुसंग परिचय खुल्ने केही नबोकेका उनीहरुले काम गर्ने स्थान समेत स्पष्ट गर्न नभनेको प्रहरीको भनाई छ । अर्का एक त्यस्तै व्यक्ति पनि आफु समस्यामा परेको भन्दै रकम संकलन गर्दै हिड्ने गरेको प्रहरीलाई सूचना आएको जनाईएको छ । मादक पदार्थ सेवन गरेर झगडा गर्ने ति व्यक्ति कहिले सानुपोखरा क्षेत्र त कहिले मेनरोड क्षेत्रमा देखिने गरेको जनाईएको छ । 
‘संचारमाध्यममा उसलाई ‘बेसहारा’ भनेर समाचार आईरहेको छ, तर ति व्यक्ति सानोपोखरा क्षेत्रमा झगडा गर्दै हिडेको अवस्था पटक पटक सम्झाउँदै पठाएको छौं ।’–सानोपोखराका स्थानीयले भने । केही यस्तै गलत काम गर्नेका कारण साच्चै समस्यामा परेकाहरु मर्कामा पर्ने अवस्था आएको उनले भने ।