दक्षिण एसियाः कोरोनाबाट मर्नेको संख्या भारतमा बढी

१६ बैशाख, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि महामारीको रुप लिएको छ ।
कोरोना सम्बन्धि तत्थ्याङक प्रस्तुत गरिरहेको वेबसाइट वल्डोमिटरका अनुसार दक्षिण एसियाली देशहरुमा सबैभन्दा बढी संक्रमित र मृतकको संख्या भारतमा रहेको छ । 
दक्षिण एसियामा कोरोनाको संक्रमणबाट सबैभन्दा बढी भारतमा ९ सय ३९ जनाको मृत्यु भएको छ । पछिल्लो समय थप ५८ जनाको मृत्यु भएपछि भारतमा मर्नेको संख्या ९ सय ३९ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या २९ हजार ४ सय ५२ पुगेको छ । पछल्लो २४ घण्टामा मात्रै यहाँ १ हजार ५ सय ६१ जना नयाँ संक्रमित थपिएका छन् । यस्तै भारतमा ७ हजार १ सय ३७ जना उपचारपछि स्वस्थ्य भएका छन् । 
भारतपछि दक्षिण एसियामा कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म २ सय ९२ जनाको ज्यान गएको छ । यहाँ २४ घण्टामा ११ जनाको ज्यान गएको छ ।
यस्तै थप ५ सय ८७ जना नयाँ संक्रमित थपिएसँगै पाकिस्तानमा संक्रमितको कुल संख्या १३ हजार ९ सय १५ पुगेको छ । 
यस्तै बंगलादेशमा कोरोना संक्रमणबाट १ सय ५२ जनाको मृत्यु भएको छ भने ५ हजार ९ सय १३ जना संक्रमित भएका छन् । बितेको २४ घण्टामा यहाँ थप ७ जनाको ज्यान गएको छ भने ४ सय ९७ जना नयाँ संक्रमित थपिएका छन् ।
यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म ७ जनाले ज्यान गुमाएका छन् भने ५ सय ८८ जना संक्रमित छन् । यहाँ पछिल्लो समय ६५ जना नयाँ संक्रमित थपिएका छन् ।
दक्षिण एसियाली मुलुकहरु माल्दिभ्स, नेपाल र भुटानमा भने कोरोनाको संक्रमणबाट अहिलेसम्म कसैको पनि मृत्यु भएको छैन । 
कोरोना संक्रमणबाट माल्दिभ्समा अहिले सम्म २ सय २६ जना संक्रमित भएका छन् भने यहाँ पछिल्लो समय १२ जना नयाँ संक्रमित थपिएका छन् ।
यस्तै नेपालमा कोरोना संक्रमितको संख्या ५२ पुगेको छ । नेपालमा अहिलेसम्म १६ जना उपचार पछि निको भएर घर फर्किएका छन् ।
यस्तै भुटानमा कोरोना संक्रमितको संख्या केही दिन यता निरन्तर स्थिर छ । यहाँ अहिलेसम्म ६ जनामा कोराना संक्रमण पुष्टि भएको । भुटानमा ४ उपचारपछि निको भएका छन भने ३ जनाको उपचार चलिरहेको छ ।