कारोनाबाट मर्नेको संख्या २ लाख २८ हजार नाघ्यो

१८ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मृतकको २ लाख २८ हजार नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया २ लाख २८ हजार १ सय ९० पुगेको छ । पछिल्लो २४ घण्टामा संक्रमणबाट ६ हजार ५ सय ८९ जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल ३२ लाख १९ हजार २ सय ४० जना मानिस संक्रमित भएका छन् । पछिल्लो २४ घण्टामा मात्रै ८१ हजार ६ सय ७८ जना नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार १० लाख १ सय १ जना उपचारपछि निको भएका छन् ।
यस्तै भाइरसका संक्रमणका कारण अहिले ५९ हजार ८ सय १७ जना गम्भीर अवस्थामा उपचार गराइरहेका छन् भने १९ लाख ३० हजार ३ सय ८ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । यहाँ अहिलेसम्म ६१ हजार ६ सय ५६ जनाको मृत्यु भईसकेको छ । पछिल्लो २४ घण्टामा अमेरिकामा २ हजार ३ सय ९० जनाको मृत्यु भएको छ । यहाँ एकैदिन २८ हजार ४ सय २९ जना नयाँ संक्रमित थपिएका छन् ।
अमेरिकापछि अहिलेसम्म इटलीमा सबैभन्दा बढी मानिसको मृत्यु भएको छ । यहाँ कोरोना संक्रमणबाट ज्यान गुमाउँनेको संख्या २७ हजार ६ सय ८२ पुगेको छ । पछिल्लो समय मृत्यु दर कम भइरहेको इटालीमा पछिल्लो २४ घण्टामा ३ सय २३ जनाको मृत्यु भएको छ ।
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २४ हजार २ सय ७५ पुगेको छ । यहाँ थप ४ सय ५३ जनाको मृत्यु भएको छ । स्पेनमा पनि विगत केही दिन यता मृतकको संख्या घटिरहेको छ ।
यसैगरी फ्रान्समा संक्रमणबाट मृत्यु हुनेको संख्या २४ हजार ८७ पुगेको छ भने बेलायतमा २६ हजार ९७ जनाको मृत्यु भइसकेको छ । 
यसैगरी कोरोना भाइरसको संक्रमणबाट बेल्जियममा ७ हजार ५ सय १, मध्यपूर्वी एसियाली मुलुक इरानमा ५ हजार ९ सय ५७, जर्मनीमा ६ हजार ४ सय ६७, नेदरल्याण्डसमा ४ हजार ७ सय ११, ब्राजिलमा ५ हजार ५ सय ११, टर्कीमा ३ हजार ८१, स्विटजरल्याण्डमा १ हजार ७ सय १६ जनाले ज्यान गुमाएका छन् ।
यसैगरी वल्डोमिटरका अनुसार दक्षिण एसियाली मुलुक भारतमा अहिलेसम्म १ हजार ७९ जनाको ज्यान गएको छ भने संक्रमितको संख्या ३३ हजार ६२ पुगेको छ । यस्तै पाकिस्तानमा मृत्यु हुनेको संख्या ३ सय ४३ पुगेको छ भने संक्रमितको संख्या १५ हजार ५ सय २५ रहेको छ ।