कारोनाबाट मर्नेको संख्या २ लाख ३९ हजार नाघ्यो

२० बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट मृतकको २ लाख ३९ हजार नाघेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया २ लाख ३९ हजार ४ सय ४८ पुगेको छ । पछिल्लो २४ घण्टामा संक्रमणबाट ५ हजार ६ सय २४ जनाको मृत्यु भएको छ । 
यस्तै अहिलेसम्म कोरोना संक्रमणबाट विश्वभर कुल ३२ लाख ९८ हजार ४ सय ७३ जना मानिस संक्रमित भएका छन् । पछिल्लो २४ घण्टामा मात्रै ९४ हजार ५ सय ५२ जना नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार १० लाख ८० हजार संक्रमित उपचारपछि निको भएका छन् ।
यस्तै भाइरसका संक्रमणका कारण अहिले ५१ हजार ३ सय ५५ जना गम्भीर अवस्थामा उपचार गराइरहेका छन् भने २० लाख २७ हजार ५ सय ६९ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । यहाँ अहिलेसम्म ६५ हजार ७ सय ५३ जनाको मृत्यु भईसकेको छ । पछिल्लो २४ घण्टामा अमेरिकामा १ हजार ८ सय ९७ जनाको मृत्यु भएको छ । यहाँ एकैदिन ३६ हजार ७ जना नयाँ संक्रमित थपिएका छन् ।
अमेरिकापछि अहिलेसम्म इटलीमा सबैभन्दा बढी मानिसको मृत्यु भएको छ । यहाँ कोरोना संक्रमणबाट ज्यान गुमाउँनेको संख्या २८ हजार २ सय ३६ पुगेको छ । पछिल्लो समय मृत्यु दर कम भइरहेको इटालीमा पछिल्लो २४ घण्टामा २ सय ६९ जनाको मृत्यु भएको छ ।
यसैगरी स्पेनलाई पछिपार्दै बेलायत सबैभन्दा बढी संक्रमित मृत्यु हुनेको तेश्रो स्थानमा पुगेको छ । यहाँ अहिलेसम्म २८ हजार २ सय ३६ जनाको ज्यान गएको छ । पछिल्लो २४ घण्टामा मात्रै यहाँ ७ सय ३९ जनाको मृत्यु भएको छ । बेलायतमा संक्रमितको संख्या १ लाख ७७ हजार ४ सय ५४ जना रहेको छ ।
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २४ हजार ८ सय २४ पुगेको छ । यहाँ थप २ सय ८१ जनाको मृत्यु भएको छ । स्पेनमा पनि विगत केही दिन यता मृतकको संख्या घटिरहेको छ । 
यसैगरी फ्रान्समा संक्रमणबाट मृत्यु हुनेको संख्या २४ हजार ५ सय ९४ पुगेको छ । यहाँ पछिल्लो समय २ सय १८ जनाको ज्यान गएको छ ।
यसैगरी कोरोना भाइरसको संक्रमणबाट बेल्जियममा ७ हजार७ सय ३, मध्यपूर्वी एसियाली मुलुक इरानमा ६ हजार ९१, जर्मनीमा ६ हजार ७ सय ३६, नेदरल्याण्डसमा ४ हजार ८ सय ९३, ब्राजिलमा ६ हजार ४ सय १०, टर्कीमा ३ हजार २ सय ५८, स्विटजरल्याण्डमा १ हजार ७ सय ५४ जनाले ज्यान गुमाएका छन् ।
यसैगरी वल्डोमिटरका अनुसार दक्षिण एसियाली मुलुक भारतमा अहिलेसम्म १ हजार २ सय २३ जनाको ज्यान गएको छ भने संक्रमितको संख्या ३७ हजार २ सय ५७ पुगेको छ । यस्तै पाकिस्तानमा मृत्यु हुनेको संख्या ४ सय १७ पुगेको छ भने संक्रमितको संख्या १८ हजार ९२ रहेको छ ।