दक्षिण एसियाः कोरोनाबाट मर्नेको संख्या भारतमा बढी

२० बैशाख, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ बाट दक्षिण एसियाली मुलुकमा भारत सबैभन्दा बढी प्रभावित भएको छ ।
कोरोना सम्बन्धि तत्थ्याङक प्रस्तुत गरिरहेको वेबसाइट वल्डोमिटरका अनुसार दक्षिण एसियाली देशहरुमा सबैभन्दा बढी संक्रमित र मृतकको संख्या भारतमा रहेको छ । 
दक्षिण एसियामा कोरोनाको संक्रमणबाट सबैभन्दा बढी भारतमा १ हजार २ सय २३ जनाको मृत्यु भएको छ । पछिल्लो समय थप ६९ जनाको मृत्यु भएपछि भारतमा मर्नेको संख्या १ हजार २ सय २३ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या ३७ हजार २ सय ५७ पुगेको छ । पछल्लो २४ घण्टामा मात्रै यहाँ २ हजार ३ सय ९४ जना नयाँ संक्रमित थपिएका छन् । यस्तै भारतमा १० हजार ७ जना उपचारपछि स्वस्थ्य भएका छन् । 
भारतपछि दक्षिण एसियामा कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म ४ सय १७ जनाको ज्यान गएको छ । यहाँ २४ घण्टामा ५६ जनाको ज्यान गएको छ ।
यस्तै थप १ हजार ६ सय १९ जना नयाँ संक्रमित थपिएसँगै पाकिस्तानमा संक्रमितको कुल संख्या १८ हजार ९२ पुगेको छ । 
यस्तै बंगलादेशमा कोरोना संक्रमणबाट १ सय ७० जनाको मृत्यु भएको छ भने ८ हजार २ सय ३८ जना संक्रमित भएका छन् । बितेको २४ घण्टामा यहाँ थप २ जनाको ज्यान गएको छ भने ५ सय ७१ जना नयाँ संक्रमित थपिएका छन् ।
यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म ७ जनाले ज्यान गुमाएका छन् भने ६ सय ९० जना संक्रमित छन् । यहाँ पछिल्लो समय २७ जना नयाँ संक्रमित थपिएका छन् ।
यस्तै माल्दिभ्समा कोरोना संक्रमणबाट १ जनाको मृत्यु भएको छ भने ४ सय ९१ जना संक्रमित पुगेका छन् । 
दक्षिण एसियाली मुलुकहरु नेपाल र भुटानमा भने कोरोनाको संक्रमणबाट अहिलेसम्म कसैको पनि मृत्यु भएको छैन । 
नेपालमा कोरोना संक्रमितको संख्या ५९ पुगेको छ । नेपालमा अहिलेसम्म १६ जना उपचार पछि निको भएर घर फर्किएका छन् ।
यस्तै भुटानमा कोरोना संक्रमितको संख्या केही दिन यता निरन्तर स्थिर छ । यहाँ अहिलेसम्म ७ जनामा कोराना संक्रमण पुष्टि भएको । भुटानमा ५ उपचारपछि निको भएका छन भने २ जनाको उपचार चलिरहेको छ ।