बामदेवलाई प्रधानमन्त्री बनाउने प्रस्ताव ‘फुस्सा’

File Photo

२० बैशाख, हेटौंडा । नेपाल कम्युनिष्ट पार्टी (नेकपा) का अध्यक्ष एवं प्रधानमन्त्री केपि शर्मा ओलीले नेकपा उपाध्यक्ष बामदेव गौतमलाई गरेको प्रधानमन्त्री बनाउने प्रस्ताव ‘हात्ति आयो हात्ति आयो फुस्सा’ भएको छ । 
यसअघि प्रधानमन्त्री बनाउने प्रस्ताव गरेका पार्टी अध्यक्ष ओली नै यस प्रस्तावबाट पछि हटेपछि उनको प्रधानमन्त्री बन्ने सपना अहिलेलाई सपनामै सिमित भएको छ । शनिबार बेलुका सम्पन्न सचिवालय बैठकले यसबारे कुनै निर्णय गरेन । ‘बैठकले उपयुक्त समयमा उहाँलाई प्रतिनिधिसभामा लैजान पहल गर्ने निर्णय गरेको छ ।’– बैठकको निर्णय सुनाउँदै पार्टी प्रवक्ता नारायणकाजी श्रेष्ठले बताए । बैठकमा प्रधानमन्त्रीले यसबारे प्रस्ताव नै नलगेको जनाईएको छ । प्रधानमन्त्री ओलीले यसअघि गौतमलाई प्रधानमन्त्री बनाउने प्रस्ताव अघि सारेसंगै देशभर यसको चौतर्फी विरोध भएको थियो ।
सचिवालय बैठकले नेपाल कम्युनिष्ट पार्टीको स्थायी समितिको बैठक बैशाख २५ गते विहान ११ बजेका लागि बोलाएको छ । पार्टी एकतालाई कमजोर पार्ने र फुट उन्मुख गर्ने कुनै पनि क्रियाकलापमा सामेल नहुन सम्पूर्ण पार्टी पंक्तिलाई निर्देशन दिने निर्णय सचिवालय बैठकले गरेको छ । बैठकमा सबैले आत्मालोचना गरेको समेत जनाईएको छ ।